د نړۍ دویم ستر الماس په ۱۷ میلیونه یورو وپلورل شو
۱۳۹۵ آبان ۲۶, چهارشنبه
په سویس کې د نړۍ یو بل تر ټولو ښکلی الماس د ۱۶ میلیونو او ۹۰۰ زره یورو په ارزښت وپلورل شو. د نړۍ دغه دویم ستر او ښکلي الماس د خرڅلاو بهیر یوازې په درې نیمو دقیقو کې پای ته ورسید.
یوه نا معلوم کس په سویس کې خرڅیدونکی دغه ۹/۱۴ قراطه الماس د تلیفون له لارې یوازې تر درې دقیقو وروسته په ۱۶ میلیونو او ۹۰۰ زره یورو واخیست.
دغه دوهم ځل دی چې یو الماس په خورا ډیرو پیسو پلورل کیږي. د نړۍ تر ټولو د ستر الماس وزن ۱۵/۳۸ قراطه دی او د روان کال د مې په میاشت کې د ۲۶ میلیونو او ۶۰۰ زره یورو په بدل کې وپلورل شو.
په ټوله نړۍ کې د بډایه کسانو ترمنځ د ښکلو او سترو الماس درلودل اوس ډیر شوی دی. خو په ورته وخت کې د قیمتي تیږو په بازار کې د ورته قیمتو تیږو عرضه له پخوا کمه شوې ده.
د الماس د خرڅلاو د دغه بولي «لیلام» یو تن چارواکي وویل چې په نړۍ کې اوس د الماسو تولید کم شوی دی او له همدې امله د دې قیمتې ډبرو قیمت تر پخوا ډیر لوړ شوی دی.
په دغه بولۍ «لیلام» کې چې یاد الماس و پلورل شو، د خپل ځانګړي رنګ له امله یو له کمیابه الماسو څخه دی چې ډیر مینه وال لري. د نړۍ یوازې یو سلنه الماس دغه راز رنګ لري.
دغه الماس داسې قطع او جوړ شوی چې نور په ډیر ظرافت سره انعکاس کوي. د دغه الماس پخوانی مالک تراوسه پورې نا معلوم دی او د نوي اخیستونکی او مالک نوم هم تر اوسه نه دی بربنډ شوی.