د کنګو ناروغۍ په افغانستان کې اته کسه وژلي
۱۳۹۴ تیر ۱۶, سهشنبه
دغه ناروغي په افغانستان کې نوې ده خو په یو شمیر سویلي افریقايي او آسیايي هیوادونو کې یې بیا ډیرې پیښې رامنځ ته کیږي. په افغانستان کې دې ناروغۍ ته کنګو وایي چې اصلې عامل یې د «کنه» په نوم یوه مضره حشره ده. که دغه حشره یو انسان وچیچي، نو د دې امکان چې هغه دې په دې ناروغۍ اخته شي رامنځ ته کیږي.
مالداران او قصابان تر نورو ډیر د دې ناروغۍ له ګواښ سره مخامخ دي. د ژویو له وینو او نورو افرازاتو سره تماس هم په دې ناروغۍ د اخته کیدو امکان ډیروي. دغه ناروغي له څارویو انسان ته او له انسانه څارویو ته لیږدول کیدای شي.
لومړنۍ نخښې نښاني
د دې ناروغۍ لومړني علایم د دوو او لسو ورځو تر منځ ترسترګو کیږي. په ناروغۍ اخته کس په لومړي سر کې په سختې سردردۍ او تبې اخته کیږي. پر دې سربیره په معده، کلمو او ملا کې دردونه هم د دې ناروغۍ له نښانو څخه دي. د کنګو ناروغۍ له پرمختګ سره، ناروغه کس وینه ضایع کوي.
د افغانستان د عامې روغتیا وزارت ویاند وحیدالله مایار، د سه شنبې په ورځ له دویچه ویله سره په خبرو کې وویل: «د ۲۰۱۵ کال له پیل راهیسې موږ تر اوسه پورې ۳۵ مشکوکې پیښې لرلې چې له ډلې څخه یې لس پیښې تایید شوې دي. دغه پیښې په کابل، هرات او ننګرهار ولایتونو کې لیدل شوې دي.»
د ناروغۍ تداوي
د عامې روغتیا وزارت چارواکي وايي چې دغه ناروغي یوازې په لومړنیو مراحلو کې د درملنې وړ ده. ډاکټران په لومړي سر کې هڅه کوي چې د ناروغ د وینې د لخته کیدو مخه ونیسي. د کنګو ویروس د ناروغ د بدن نورو غړو ته هم زیان رسولی شي.
ښاغلي مایار وویل چې د افغانستان د عامې روغتیا وزارت هڅه کوي چې د دې ناروغۍ د مخنیوي په موخه خلکو ته د هغې په اړه معلومات ورکړي. پر دې سربیره د چارواکو په خبره د عامې روغتیا او مالدارۍ وزارتونو تر منځ د دې ناروغۍ د مخنیوي له پاره همغږي رامنځ ته شوې ده.