سنودن ته د نوبل بديله جايزه ورکول کیږي
۱۳۹۳ مهر ۳, پنجشنبه
د امريکا د متحده ايالتونو د ملي امنيت د ادارې یا NSA پخواني کارکونکي، ايدوارد سنودن ته د ۲۰۱۴م کال د نوبل بديله جايزه ورکول کيږي. ياده جايزه د «رايت لايفليهود اېوارد» نومي بنسټ له خوا هغو کسانو ته ورکول کيږي چي د دغه بنست په حواله ژوند يې د چاپيريال او انسانيت له پاره يوې مهمي موضوع ته وقف کړی وي.
دا چي سنودن ته دغه جايزه ورکوله کيږي د جايزې د ژوري هيئت داسي توجيه کړې: «ځکه چي هغه [سنودن] په زړورتيا او په وړتيا او کفايت سره د هغې پراخي دولتي څارنې څخه پرده ليري کړه چي بنسټيزه ديموکراتيکي پروسې او په اساسي قانون کي تضمين سوي حقونه زیانموی.»
ژورناليزم د عامه ښېګڼي له پاره
د نوبل په سږنۍ بديله جايزه کي د بريتانوۍ ورځپاڼي «ګاردين» مسوول مدير اېلن رسبريجر، د سنودن شريک دی. نوموړي د سنوډن له خوا ورته سپارل سوي معلومات خپاره کړي ول. د جايزې ژوري هيئت ايلن رسبريجر، ته د جايزې ورکول داسي توجيه کړي دي: «هغه د زياتو فشارونو باوجوده د دولتونو د غېرقانوني چلن څخه پرده پورته کړې او د رسنيو يو داسي نړیوال سازمان يې جوړ کړی دی چي د عامه ښېګڼي له پاره يې ژورناليزم خپل شعار ګرځولی دی.»
خو سياستوال او د امنيتي ادارو چارواکي پر ايلن رسبريجر تور لګوي چي د حساسو معلوماتو له بربنډولو سره يې ملي امنيت ته ګواښ رامنځ ته کړی او د ترهګرو کار یې آسانه کړی دی.
د نوبل بديله سږنۍ جايزه په پاکستان کي د بشري حقونو فعالې عاصمه جهانګير، او په سريلنکا کي د بشري حقونو د کميشن غړي باسيل فيرناندو، ته د بشري حقونو له پاره د مبارزې په بدل کي ورکړل سوې ده. یوه بله جايزه د چاپيريال ساتنې امريکايي فعال بيل مېک کنيبن ته ورکول کیږي. د درو جايزو له ګټونکو څخه هر يو ته تقريبا ۵۰ زره يورو هم سپارل کیږي.