مهاجرین د ايټاليا د ميلان ښار کوڅې پاکوي
۱۳۹۶ آذر ۲۳, پنجشنبه
د مهاجرو په تړاو د خبرونو وېبپاڼي انفو مايګرنټ په خپل يو راپور کي ليکلي چي د «ښکلی ميلان» په نوم يوه پروژه د اېټاليې په ميلان ښار کي پېل کړل سوې ده. په راپور کي راغلي چي دغه پروژه د بې روزګارو مهاجرو او د هغو بې روزګارو بهرنيانو له پاره د روزګار برابرولو په مقصد جوړه سوې ده، چي د ايټالوي تابعيت ترلاسه کولو له پاره يې غوښتنليک لېږلی دی.
د ياد مقصد له پاره جوړو کړل سوو لومړيو څلورو کاري ډلو د ميلان ښار د اورګاډو د مرکزي تمځي په پاکولو د دغې پروژې پېل وکړ.
په هره کاري ډله کي دوه مهاجر، يو بې روزګار کس او د يوې کاري کمپنۍ يو سرکارګر شامل دي. دغه کسان په اونۍ کي شپږ ورځي د ميلان ښار کوڅې، سړکونه او څلور لاري پاکوي او يو د بل سره په تماس کي پاته کيږي.
په پام کي نيول سوې چي د دغو کاري ډلو شمېر و ۲۰ ته زيات کړل سي. په دې ترڅ کي د ميلان د ښار څخه د ډيرانونو او فاضله توکه د پاکولو د يوې کمپنۍ سره همکاري کيږي. په پام کي ده چي دغه کاري ډلې به د ميلان په ښار کي د سړکونو او کوڅو تر څنګ د پارکونو او هغو ځايونو پاکي هم کوي چيري چي بي کوره خلک خپل ډيران لري. د دغو کاري ډلو په وظايفو کي به د کاغذونو او د ريسايکل وړ نورو موادو راټولول هم وي.
ايټاليې ته د رسېدونکو پناه غوښتونکو د عزت نفس د ساتنې له پاره بېلابېلې کاري پروژې په ۲۰۱۶ کال کي پېل کړل سوي وې. په دې ترڅ کي د چاپيريال ساتنې له پاره د کار کوونکي يو سازمان د «راځئ نړۍ پاکه کړو» په پروژه کي پنځه سوو مهاجرو ګډون کړی ؤ.
د مهاجرو له لوري په رضاکارانه کارونو کي د ونډې اخيستنې دا دويم کال دی. د اړونده ښار ښاروالي دغو کسانو ته يو ډول جوازونه هم ورکوي. د ميلان ښار يو چارواکي ويلي چي دا يوه ښکلې پروژه ده چي پکښي د عامو وګړو تر څنګ مهاجرهم په رضاکارانه توګه برخه اخلي.
په دې هکله یو انځوریز رپوټ زموږ له آرشیف څخه: