نړیوال بانک له برما سره ۲۴۵ میلیونه ډالره مرسته کوي

نړیوال بانک په پام کې لري چې برما ته ۲۴۵میلیونه ډالره پور ورکړي. په دې شان به دغه سویل آسیایي هیواد په تیرو پنځویشتو کلونو کې د لومړي ځل له پاره د نوموړي بانک مالي مرسته تر لاسه کړي. نړیوال بانک په دې شان سره په برما کې د پنځو لسیزو وروسته د ظالمانه نظامي واکمنۍ وروسته د اصلاحاتو رامنځ ته کولو ته خپل غبرگون ښوولی دی.

په عین وخت کې د ملگرو ملتونو د کډوالو ادارې د برما له گاونډیو هیوادونو څخه غوښتي دي هغه مسلمانان چې په برما کې تر تعقیب لاندې دي په خپلو هیوادونو کې ومني. د کډوالو د نړیوال سازمان موخه د روهینگیا د مسلمانانو څخه ده، چې په اوسني وخت کې د ویرې او تاوتریخوالي له امله له خپل هیواد څخه په ځانگړي توگه بنگله دیش او مالیزیا ته کډه کیږي.