1. محتوا ته تګ
  2. اصلي مینو ته تګ
  3. د دویچه ویله نورو پاڼو ته تګ

«پاکستان د سولي په پروسه کي مرسته کوي»

حسين سيرت۱۳۹۳ اسفند ۱۲, سه‌شنبه

د افغانستان د بهرنيو چارو وزارت وايي چي له پاکستان سره ئې اړيکي يوه نوي پړاو ته رسېدلي او پاکستاني چارواکو په افغانستان کي د سولي او ثبات په ټينگولو کي د مرستي ډاډ ورکړی دئ.

https://p.dw.com/p/1EkOJ
انځور: DW/H. Sirat

د افغانستان د بهرنيو چارو وزارت په خبره د پاکستان همکارۍ کولای سي په افغانستان کي د سولي له پاره لار پرانيزي. افغان حکومت اميدوار دی چي پاکستان به طالبان دې ته اړکړي چي له دوی سره خبرو ته کښېني.

بله خوا بیا د افغانستان د سولي عالي شورا ويلي دي چي د دوی څوتنو غړو تر هيواد دباندي سفر کړی دئ او په پام کي ده چي په متحدو عربي اماراتو کي به د طالبانو له استازو سره خبري اتري وکړي.

د افغانستان د بهرنيو چارو وزارت وياند احمد شکېب مستغني د سه شنبې په ورځ (۲۰۱۵م کال د مارچ مياشتي ۳مه) په کابل کي يه يوه خبري غونډه کي وويل: «د افغانستان اسلامي جمهوريت د خپل گاونډي هيواد پاکستان د هغو ژمنو چي د افغانستان د سولي په برخه کي ئې کړي دي، هرکلی کوي.»

له طالبانو سره د خبرو اترو تلاښونه وروسته له هغه ډېر سول چي د پاکستان پوځي چارواکو ژمنه کړې ده چي طالبان به د سولي له پاره د خبرو اترو مېز ته کښېنوي. خو د سياسي څېړونکي په نظر که طالبان سخت شرطونه کښېږدي نو سولي ته رسېدل به گران کار وي.

د سياسي چارو کارپوه احمد سعيدي وايي چي طالبان په اساسي قانون کي د بدلون او له هيواده د بهرنيو ځواکونو د وتلو غوښتونکي دي، چي د دې شرطونو منل د افغانستان له پاره ډېر گران کار دئ او دغه پروسه يعنی د سولي، به له ماتي سره مخامخ سي.

يوه بله ستونزه په افغانستان کي د جنگي طالبانو ده. د کارپوهانو په خبره کيدای سي هغوی ته د دغو طالبانو چي اوس غواړي له افغان حکومت سره خبري وکړي، پريکړي د منلو نه وي.

په دې وروستيو کي د پاکستان د علماوو شورا هم په افغانستان کي د سولي پروسې ملاتړ کړی دئ او په پلان کي ده چي په روانه مارچ مياشت کي به اصلي خبري اتري پيل سي.