پاکستان: 2.5 میلیونه سېلاب ځپلي ناروغه دي
۱۳۹۰ شهریور ۲۵, جمعه
د قدرتي آفاتو سره د مبارزې پاکستانۍ ادارې پر نړۍ والو ږغ کړی دی چي د سندهـ ايالت د سېلاب ځپلو سره په مرستو کي ورسره کومک وکړي. د نيشنل ډيزاسټرمېنجمنټ اتارټي دغې ادارې ويلي دي چي که په سمدلاسه توګه نړۍ والې مرستې ورته ونه رسيږي نو د زرګونو انسانانو د ژوندونونو د له منځه تلو ګواښ موجوده دی.
آکسفام نومي يوې غېر حکومتي مرستندويه ادارې له مخه لا ويلي ول چي په سندهـ ايالت کي څه باندي پنځوس لکه انسانان د سېلاب څخه اغېزمن سوي دي.
يوازي د چهارشنبې په ورځ (د سپتامبر 15 مه) د څه باندي 50 انسانانو د وژل کېدو خبرونه ورکول سوي ول. د مرستندويه ټولنو لخوا ويل سوي چي په سږني سيلاب کي زياتي ناروغۍ هم خپرې سوي دي. پدې ترځ کي ويل سوي چي څه باندي شپږ لکه انسانان د سترګو د ناروغيو، پنځه نيم لکه د پوستکي د ناروغيو، تقريبا درې لکه د تنفسي ناروغيو او څه باندي اوه نيم لکه د کولورا د ناروغۍ سره مخامخ سوي دي.
يوه ځايي ژورنالست وکيل الرحمن د المان ږغ ډويچه وېله ته وويل چي د سندهـ ايالت د 23 ولسواليو څخه 17 د سېلابونو څخه اغېزمنې سوي دي. هغه زياته کړه چي د سندهـ ايالت په سترو ښارونو کراچي او حيدر آباد کي هم سېلابونو زيانونه اړولي دي.
پاکستان تېر کال د خپل تاريخ د تر ټولو ستر سېلاب سره مخامخ سوی ؤ چي پکښي په لسګونو زره انسانان ډوب سوي ول او په مليونونو انسانانو خپل کورونه د لاسه ورکړي ول. هغه مرستي چي پدې ترځ کي د نړۍ والو لخوا د پاکستان د حکومت سره سوي وې د يو شمېر کتونکو په وينا زياته برخه يې په اداري فساد کي له منځه تللې ده. د دې تر څنګ بې پلوه کارپوهان پر پاکستانيو ادارو تور لګوي چي د سږني سېلاب لپاره يې د تېر کال د ترخې تجربې باوجوده سم چمتو والی نه ؤ نيولی.
احمدولي اڅکزی
کتونکی: سيد رياض