یونکر: ترکيه دې د مهاجرت د تړون درناوی وکړي
۱۳۹۵ آذر ۷, یکشنبه
د اروپايي کمیسيون مشر ويلي دې چې اروپايي اتحاديې او ترکيې ته په کار ده چې د مهاجرت موضوع اړوند ترسره شوي تړون ته درناوي وکړي. اروپايي اتحاديې او انقرې د روان کال د مارچ په اتلسمه نيټه په بروکسل کې اروپا ته د مهاجرو د مخنيوي په موخه يو تړون لاسليک کړ.
د اروپايي کميسیون مشر جان کلاود يونکر ويلي دي چې ترکيې سره د مهاجرت تړون ته درناوی کول په کار ده او راتلونکې کې دې هم پر هغه باندې عمل کول جاري وساتل شي. هغه دغه خبرې د «لا لبري بيلجيک» ورځپاڼې سره په يوه مرکه کې کړي دي. د يونکر په وينا څرنګه چې د تړون تصميم د اروپايي اتحاديې لخوا نيول شوی دی، د هغه تطبيقول هم اړين بولي.
يونکر په خپلو خبرو کې وويل چې له ۲۰۰۳ تر ۲۰۱۴ کاله پورې، په اروپايي اتحاديه کې د ترکيې د يو ځای کيدو په باب د دموکراتيکو ارزښتونو په رڼا کې مثبت پرمختګونه شوي دي. د يونکر پر وينا چې ترکيې په تيرو دوو کلونو کې اروپايي اصولو او ارزښتونو ته شا کړې ده چې پر وينا د دواړو لورو تر منځ د راولاړو شويو ستونزو اصلي لامل په همدې کې دی.
«اصلي لامل پخپله ترکيه»
د اروپايي کميسيون مشر په وينا، د ترکيې ولسمشر رجب طيب اردوغان او د هغه حکومت اوس خپلو تيروتنو ته په کتو، پر اروپايي اتحاديې له وخت څخه د مخه تور لګوي ځکه چې په اروپايي اتحاديه کې د ترکيې د يو ځای کيدو په برخه کې دغه هيواد له سترو خنډونو سره مخ دی.
يونکر زیاته کړه، په اروپايي اتحادیې کې د ترکيې د ګډون په اړه مذاکراتو کې چې کوم ځنډوالی رامنځ ته شوی د هغه اصلي لامل په خپله ترکيه ده، ځکه چې هغوې (ترکيه) د تروریزم ضد قانون اصلاح ته غاړه کينښوده، په داسې حال کې چې اروپايي اتحاديه کې د غړيتوب ترلاسه کولو د پاره پر دې موضوع عمل کول يو اړين شرط دی.
يونکر د ترکيې ولسمشر ته په خطاب وويل چې دی دې پر اتحاديې تر تور لګولو د مخه، په دې باندې فکر وکړي چې په اروپايې هيوادونو کې د ترکيي وکړو آزاد تک راتک ته د امکاناتو د نه برابريدو په برخه کې د ده خپل مسئوليت څومره دی.
له بل پلوه، دوه ورځې مخکې د آلمان صدراعظمې انګلا مرکل په اروپايي اتحاديې او ترکيې باندې ټينګار وکړ چې د مهاجرت تړون ته دې درناوی ولري. د مرکل د جمعې ورځ دغو څرګندونو ته د اروپايي اتحاديې او ترکيې تر منځ د رامنځ ته شویو اختلافاتو د کميدو په برخه کې د مرستې کونکې په سترګه کتل کيږي.
پر ورته موضوع یو انځوريز البوم زموږ له آرشيف څخه (30.06.2015):