پاکستان د ناټو پر اکمالاتي قطارونو لاره وتړله
۱۳۹۰ آذر ۵, شنبه
دغه پیښه په داسې وخت کې رامنځ ته کیږي چې په پاکستان کې د اسامه بن لادن تر وژل کیدو را په دیخوا د پاکستان او امریکا تر منځ اړیکې لا اوس هم ترینګلې دي.
پاکستان دغه برید په ښکاره توګه د خپلې خاورې د ملي حاکمیت پر ضد تیری بللی. د پاکستان د بهرنیو چارو وزارت دغه برید په کلکه غندلی. د پاکستان د بهرنیو چارو د وزارت ویاندې، تهمینه جنجوعې، د یوې بیانېې په ترڅ کي ویلي دي:
«د پاکستان لمړي وزیر، یوسف رضا ګیلاني، د ناټو له لوري د پاکستان پر پوځي پوستې برید په کلکو ټکو غندلی دی. د هغه په لارښوونه به د بهرنیو چارو وزارت د ناټو او امریکا متحده ایالاتو سره د دغې پیښي په هکله په سختو ټکو کې خبري وکړي.»
د پاکستان دولتي تلویزون خبر ورکړی چې لمړي وزیر، یوسف رضاګیلاني، خپل پلرني ښار ته سفر لنډ کړی او بیرته اسلام آباد ته راستون شوی ترڅو د پاکستان له ولسمشر، آصف علي زرداري، او د پوځونو مشر، جنرال اشفاق کیاني، سره وګوري. د هغه سربیره به هغه په یوه بله بیړنۍ غونډه کې هم ګډون وکړي چې په هغې کې به د کابیني وزیران، د پاکستان د پوځ، هوایي او سمندري ځواکونو مشران هم ګډون وکړي.
دوو پوځي چارواکو ویلي دي چې په نوموړې پیښه کې ۲۸ تنه وژل شوي او نور ۱۱ تنه ټپیان دي. دغه پیښه د افغانستان پولې ته څیرمه د مومند ایجنسۍ د بایزې د سیمي د سلالا په پوسته کې رامنځ ته شوې.
د پاکستان د پوځ یوه لوړپوړي چارواکي ویلي دي چې په دې اړه هڅي رواني دي ترڅو د وژل شوو سرتیرو جسدونه د مو مند ایجنسۍ مرکز ته انتقال شي. دغه پاکستاني چارواکې د نوم د نه بربنډیدو په شرط ویلې چې د پاکستان پر پوځیانو دغه برید به کلک ځواب ولري.
د ناټو لخوا په بمبارۍ کې د پاکستاني سرتیرو تر وژل کیدو وروسته پاکستان د ناټو پر اکمالاتي قطارونو خپل سرحد وتړه. یو لوړپوړي دولتي چارواکي، مطهر زیب، د رویټرز خبري آژانس ته ویلي چې د ڼاټو په ۴۰ اکمالاتې لاریو یې پوله تړلې دی. دا په داسې حال کې ده چې یو بل امنیټې چارواکي ویلي چې د افغانستان او پاکستان تر منځ پوله د امنیتي دلایلو له کبله تړل شوې ده.
په کابل کې د ناټو ځواکونو ویاند ویلي چې له پیښي څخه خبر دي خو په اړه یې نور معلومات راټولوي.
آژانسونه/ سید ریاض
کتونکی: مسعود جهش