Пракуратура вынесла папярэджанне журналістцы Ірыне Халіп

Пракуратура Мінску вынесла папярэджанне незалежнай журналістцы Ірыне Халіп за артыкулы ў расійскай “Новой газете”, прысвечаныя прэзідэнцкім выбарам у Беларусі і акцыям пратэсту супраць фальсіфікацыі іх вынікаў. У спіс пракуратуры трапілі больш за 10 артыкулаў, напісаных Ірынай Халіп да і пасля прэзідэнцкіх выбараў. У папярэджанні, падпісаным намеснікам пракурора Мінску Семіжонам, гаворыцца, што артыкулы журналісткі быццам бы “ўтрымлівалі несапраўдныя звесткі пра вынікі галасавання і пра парушэнні правоў выбарцаў, а таксама заведама ілжывыя звесткі пра Рэспубліку Беларусь, звесткі, што абражаюць гонар і годнасць прэзідэнта Рэспублікі Беларусь”. Журналістку папярэдзілі, што яе могуць звінаваціць у парушэнні артыкулу Крымінальнага кодэксу – “дэскрыдытацыя Рэспублікі Беларусь”, што можа ёй пагражаць арыштам на 6 месяцаў альбо пазбаўленнем волі на тэрмін да двух гадоў, а таксама ў парушэнні артыкулу Крымінальнага кодэксу “паклёп у дачыненні да прэзідэнта Рэспублікі Беларусь”, за што караюць штрафам, папраўчымі работамі на тэрмін да двух гадоў, пазбаўленнем альбо абмежаваннем волі на тэрмін да чатырох гадоў.