Пракуратура пагражае Людміле Гразновай крымінальным пераследам

Cтаршыню Беларускага праваабарончага альянсу, намесніцу старшыні Аб'яднанай грамадзянскай партыі Людмілу Гразнову выклікалі ў пракуратуру Савецкага раёну Мінску і прыгразілі крымінальнай адказнасцю за "заведама ілжывы данос". Так былі расцэненыя выказванні Гразновай на сайце "Хартыі-97", дзе праваабаронца казала пра грубае фальшаванне вынікаў выбараў, масавыя арышты і збіццё ўдзельнікаў акцыяў пратэсту. Следчы пракуратуры Аляксандар Агафонаў патрабаваў ад Людмілы Гразновай падаць доказы фальшавання выбараў, а таксама таго, што ў краіне мелі месца масавыя арышты і збіццё дэманстрантаў у часе выбарчай кампаніі. Праваабаронца спаслалася на шматлікія інфармацыйныя інтэрнэт-сайты і на інфармацыю ў незалежных і замежных медыях. Гразнова выказала меркаванне, што яе выклікалі ў пракуратуру дзеля запалохваньня напярэдадні Чарнобыльскага шляху.