A planifikon Al-Kaida sulme ndaj trenave të shpejtë?
19 Gusht 2013Shërbimi sekret amerikan NSA sipas qarqeve të sigurisë duhet të ketë zbuluar informacione për sulme të planifikuara nga Al-Kaida në Evropë. Këtë e njofton gazeta "Bild" në numrin e saj të sotëm.
Sipas gazetës, NSA "para disa javësh" ka përgjuar një telefonatë në mes drejtuesve të lartë të rrjetit terrorist. Sipas informacioneve të gazetës, në të duhet të jetë bërë fjalë për një seri sulmesh ndaj trenave të shpejtë.
Sabotazh dhe sulme
Sipas informacioneve të ekspertëve të sigurisë ka gjasa të ketë akte sabotazhi në shina dhe në linjat elektrike të tyre, si dhe sulme me lëndë shpërthyese në trasetë apo tunelet e trenave të shpejtë, si dhe sulme me bomba në vetë trenat e shpejtë.
Autoritetet gjermane të sigurisë janë vënë në alarm, njofton gazeta "Bild". Për këtë arsye prej më shumë se dy javësh në stacionet hekurudhore dhe trasetë e trenave të shpejtësisë së lartë ICE janë shtuar masat e sigurisë, ndër të tjera edhe me patrullime intensive të policisë.
Në Ministrinë e Brendshme sipas agjencisë së lajmeve Reuters të hënën në mëngjes herët, nuk kishte asnjë pozicionim në lidhje me këtë njoftim.
Shërbimi i fshehtë amerikan, NSA javët e fundit ka qenë nën breshërinë e kritikave, për shkak se ai ka spiunuar në shkalllë të gjërë në internet dhe ndoshta edhe në telefoninë celulare. Shërbimi i fshehtë gjerman BND duhet të ketë bashkëpunuar. Publik këtë praktikë e bëri ish punonjësi i NSA Edward Snowden, të cilit i është dhënë ndërkohë azil në Rusi.