Bajerni (gati) kampion, Herta ra në kategorinë e dytë
2 Maj 2010Të tre golat për ekipin e bavarezëvë i shënoi Thomas Müller dhe i siguroi ekipit të tij mbetjen në vendin e parë të tabelës. Mirëpo titulli i kampionit një javë para se të përfundojë kampionati u bë i mundur pasi që ekipi i Shalkes humbi në fushën e vet nga Verderi i Bremenit me rezultat 0:2. Trajneri i Shalkes Felix Magath i uroi titullin Bajernit, por ishte shumë i zemëruar për shkak se në pjesën e parë të ndeshjes, referi nuk tregoi në pikën e bardhë, pas një ndërhyrje të palejueshme në zonën e rreptësisë të Mertesackerit kundër Höwedesit të Shalkes.
Sidoqoftë, zyrtarisht Bajerni ende nuk është kampion, por përveç tri pikëve epërsi, ekipi nga Mynihu ka golavarazh më të mirë se Shalke me 17 gola më shumë. Trajneri i Bajernit Louis van Gaal pas fitores u shpreh i gëzuar: "E prisja që Shalke nuk do të fitonte. Kam ftuar dy vajzat, nipat... Është një mbrëmje shumë e bukur."
Verderi i Bremenit është në pozitën e tretë dhe ka më së shumti gjasa që të futet në kualifikime për Ligën e Kampionëve. Nga kategoria e parë e Bundeligës ka rënë Herta e Berlinit, pas një barazimi 1:1 me Bajerin e Leverkuzenit. Ndërsa në javën e fundit Bohumi, Nyrembergu dhe Hanoveri do të vendosin se cila prej tyre do të bie në ligën e dytë. Në ndeshjet tjera të ditës së djeshme u shënuan këto rezultate.
Shtutgart - Majnc 2:2;
Hanover - Mënhengladbah 6:1;
Hamburg - Nyremberg 4:0;
Frankfurt - Hofenhajm 1:2;
Këln - Frajburg 2:2 dhe
Dortmund - Volfsburg 1:1.
Autor: Bahri Cani
Redaktoi: Lindita Arapi