1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW

Dhjetëra mijëra vetë kërkojnë zgjedhje të reja në Serbi

17 Prill 2011

Pakënaqësia e serbëve me qeverinë e tyre po shtohet. Dhjetëra mijëra vetë dolën për këtë arsye sërish në rrugë. Ata e akuzojnë qeverinë për korrupsion. Ekonomia është e dobët, papunësia në rritje.

https://p.dw.com/p/10uyL
Dhjetëra mijëra vetë në Beograd kërkojnë zgjedhje të reja në vend.Fotografi: AP

"Serbia nuk e duron më regjimin e hajdutëve, që vjedh të gjithë vendin“ - kjo ishte thirrja e Aleksandar Vucicit nga Partia Nacionaliste e Përparimit. Dhjetëra mijëra vetë nga i gjithë vendi kishin ardhur në Beograd të shtunën (16.04.2011), për të demonstruar kundër qeverisë. Në protestat në „ditën e ndryshimit“ vlerësohet se morën pjesë 70.000 vetë. Ata kërkojnë zgjedhje të reja më 18 dhjetor.

Por qeveria nën drejtimin e presidentit Boris Tadic deri tani nuk ka lëshuar pe. Zgjedhjet e rregullta duhet të zhvillohen në Serbi në vitin 2012. Tadic pranon mbajtjen e zgjedhjeve të parakohshme, pasi BE të ketë vendosur për pranimin e Serbisë në Union, por kjo nuk ka gjasa të ndodhë para fundit të vitit.

Serbien Belgrad Opposition Demonstration
Mbështetës të Partisë së Përparimit në opozitë protestojnë në demonstrimin e madh të opozitës në Beograd. 16.04.2011.Fotografi: picture alliance / dpa

Opozita nuk dorëzohet

Ky nuk ishte demonstrimi i parë masiv me të cilin opozita synon të arrijë ndryshimin. Në muajin shkurt dhjetëra mijëra aktivistë dhe opozitarë dolën në rrugë për të protestuar. Ata kërkonin të shfrytëzonin për arritjen e objektivave të tyre atmosferën e revolucionit që krijuan ndryshimet politike në Tunizi dhe Egjipt, por deri tani pa sukses.

Lideri i opozitës serbe Tomislav Nikolic iu drejtua edhe mjeteve të tjera për të shtuar trysninë ndaj Tadicit dhe kabinetit të tij: ai ka hyrë në grevë urie. Nikolic ka thënë se do të ndërpresë grevën vetëm nëse merret vendimi për zgjedhje të reja. Duke iu drejtuar presidentit, politikani opozitar tha: „nëse mua më ndodh diçka e ekqe, ai duhet të shpallë zgjedhje të reja.“ Edhe protestat paqësore do të vazhdojnë.

Në sondazhe partia SNS ndodhet para Partisë Demokratike në pushtet të Boris Tadicit. Kjo e fundit demonstroi forcën e saj me një prani të madhe policësh dhe njësish antiterror gjatë demonstrimit. Por mbështetja në popullsi po ulet vazhdimisht. Përballë papunësisë në rritje, tashmë në nivelin 27%, dhe pagave në rënie, shumë serbë e akuzojnë qeverinë se nuk bën asgjë.

Zehntausende fordern Neuwahlen in Belgrad
Opozita ka mbështetje të fortë në popull.Fotografi: AP

Quo vadis Serbi?

Ashtu si shumë vende të Evropës edhe Serbia është goditur rëndë nga kriza ekonomike mbarëbotërore. Por ekspertët nuk i shohin problemet e vendit vetëm tek kriza ekonomike. Edhe ekonomia ilegale dhe korrupsioni lulëzojnë, para së gjithash në politikë. Organizata joqeveritare Transparency International e radhiti Serbinë në vendin e 78 nga 178 vende në indeksin ndërkombëtar të korrupsionit 2010. Ajo flet për korrupsion sistematik, pasi zyrtarët kanë hapësirë të madhe në interpretimin e ligjeve dhe rregullave. Kjo favorizon abuzimet.

Presidenti Tadic synon ta fusë Serbinë në BE. Qeveria serbe paraqiti një kërkesë për anëtarësim në dhjetor 2009. Por njohësit e BE-së mendojnë se rruga e Serbisë deri në anëtarësim do të jetë e gjatë, dhe jo vetëm për shkak të krizës ekonomike. Beogradi nuk e njeh ende Kosovën shtet. Edhe bashkëpunimi me gjykatën ndërkombëtare për krime lufte në ish-Jugosllavi nuk është optimal: përpjekjet për dorëzimin e ish-kriminelëve të luftës nga koha e luftës në vitet '90, si Ratko Mladic, duket se kanë ngecur në vend.

Autor: Nicole Scherschun (afp, dpa, dapd) / E.Xhani
Redaktoi: Elert Ajazaj