"Diana" - Mbretëresha e zemrave në ekranin e kinemasë

Për shkak të afërsisë së saj me popullin dhe angazhimit social, Princesha Diana konsiderohej si "mbretëresha e zemrave". Regjisori gjerman Oliver Hirschbiegel e trajton tani këtë temë në film, gati 17 vjet pas vdekjes tragjike të Dianës. Në 09.01.2014 filmi "Diana" do të shfaqet në kinematë gjermane pas premierës në Londër në verë 2013.

Filmi merret kryesisht me lidhjen e Dianës me kardiokirurgun Hasnat Khan (në rol në film aktori Naveen Andrews), gjatë dy viteve të fundit të jetës së saj. Megjithatë shumë pak të dhëna ka për lidhjen e saj me mjekun me origjinë nga Pakistani, i cili kurrë nuk ka folur mbi këtë dashuri, madje as me gazetaren Kate Snell, tek libri i së cilës "Diana- dashuria e saj e fundit" bazohet edhe filmi.

Roli kryesor, që interpretohet nga aktorja Naomi Watts është bërë shumë i diskutueshëm, sepse ka shumë pak ngjashmëri mes dy zonjave. Gjithçka dukej perfekte vetëm pas makiazhit artistik. Pas premierës, Watts mori shumë lëvdata. Një gazetë gjermane shkroi se aktorja 44- vjeçarje për të gjitha skenat e kishte studiuar shumë mirë rolin.

Pak vëmendje i kushton filmi popullaritetit të jashtzakonshëm të Dianës. Ndonëse angazhmi i saj humanitar trajtohet në të, ai mbetet nën hijen e historisë së dashurisë. Madje, edhe vetë regjisori Oliver Hirschbiegel e ka pohuar një gjë të tillë duke u shprehur para premierës së filmit se: "Edhe po të mos i kishim përdorur në film këto dy emra, kjo do të mbetej një histori e bukur dashurie."

Filmi "Diana" mund të konsiderohet një vazhdim i tregimit të pafund të jetës dhe vdekjes së princeshës britanike. Interesimi tradicional i medias bulevardeske për oborrin mbretëror ka qenë i jashtëzakonshëm gjatë kohës kur jetonte Diana dhe pas aksidentit ai u shumëfishua. Premierat spketakolare në Londër shfrytëzohen me shumë rafinesë prej industrisë së pangopur të filmit.

Se sa të vërteta ka në film, kjo nuk i interson askujt. Në një intervistë për një gazetë britanike, mjeku pakistanez Hasnat Khan së fundi kritikoi, që edhe libri bazohet vetëm në "shpifjet e miqve të Dianës". Ai vetë nuk do ta shohë filmin, por kjo nuk do ta dëmtojë biznesin. Filmi pritet të ketë sukses tek publiku.

Faktin që nuk është britanik, regjisori Oliver Hirschbiegel e sheh si avantazh. "Si gjerman nuk jam aspak pjesë e asaj që ndodh në këtë vend", është shprehur ai. Ai ka punuar me ndjesinë e mundësisë së ofruar për realizimin e një filmi sa më autentik dhe të vërtetë.

Popullariteti i princeshës së vdekur do të mbetet i njëjtë në të gjithë botën edhe pas këtij filmi. Kjo u konfirmua edhe një herë gjatë premierës botërore të ejten (05.09.2013) në Londër. Shumë adhurues të Dianës u mblodhën dhe e përkujtuan atë. Në kinematë gjermane filmi "Diana" do të shfaqet duke nisur nga 9 janari i vitit të ardhshëm.