Disqe të publikuara pas vdekjes
Ata kanë vdekur prej vitesh, por emri bën që shitja e disqeve të përjetojë vazhdimisht bum. Industria diskografike vazhdimisht shet albume të legjendave të muzikës. Tani po qarkullon në treg vepra e re e Frank Zappas.
Muzikantët e vdekur jetojnë më gjatë
Frank Zappa ka 22 vjet që ka vdekur. Por tani u publikua albumi më i fundit, "Dance me this", rezultat i një regjistrimi në studio, me eksperimente në synclavier dhe me këngë mongole të kënduara me zë fyti. Për fansat diçka e rrallë, në listat e hitparadës disku me siguri nuk do të zërë vend. Në raste të tjera, back-katalogu i artistëve që nuk jetojnë më mund të jetë një minierë e vërtetë ari.
Michael Jackson shumë i shitur
Ai prehet në paqe që prej vitit 2009, por zëri i tij është më se i gjallë: më 2014 doli në qarkullim "Xscape"; pas albumit "Michael", ky ishte i dyti album i botuar pas vdekjes i King of Pop. Producenti i famshëm Timbaland përgatiti në pult tetë tituj të papublikuar, duke u shtuar zëra të shquar për duet si Mary J. Blige apo D'Angelo. "Xscape" nuk do të jetë albumi i fundit i "Jacko"-s së vdekur.
Elvisi jeton
Elvis Presley thyen çdo rekord: deri kur vdiq, më 1977 ai publikoi 600 milionë albume, ndërkohë janë publikuar më shumë se dy miliardë disqe dhe kaseta. Shtëpia e tij e fundit në Graceland ka kohë që është kthyer në qendër pelegrinazhi për fansa nga mbarë bota. Kur në përvjetorin e 25-të të vdekjes doli në qarkullim kompakt-disku "Elvis 30 #1 Hits", në më shumë se 17 vende ai kryesoi hitparadën.
Këngë nga Andaluzia
Paco de Lucia mbahej si mjeshtri i madh i kitarës për Flamencon. Ai i vuri emrin e tij këtij zhanri në shekullin e 20-të. Kur spanjolli vdiq 66 vjeç në shkurt 2014, ai ende kishte shumë plane: mes të tjerash ai punonte për albumin e tij të parë që prej dhjetë vjetësh, të cilin ia kishte kushtuar këngëve popullore Copla të atdheut të tij. "Cancion Andaluza" doli në treg në fund të prillit 2014.
Reggae nga mjeshtri
Kur më 1983 u publikua albumi i Bob Marley "Confrontation", muzikanti më i famshëm i Reggae në botë kishte dy vjet që kishte vdekur. Gruaja e tij Rita pati kaluar nëpër duar materialet e papublikuara, që i publikoi së bashku me bandën e Marley "The Wailers". "Buffalo Soldier", një monument muzikor për ushtarët afro-amerikanë të SHBA në luftën civile u bë një nga hitet më të famshme të xhamaikanit.
Figurë me prestigj e lëvizjes Hippie
Janis Joplin vdiq në tetor '70 nga një mbidozë heroine duke hyrë në "Club 27" të heronjve të muzikës që vdiqën të rinj. Ajo ndodhej në kulmin e punës për regjistrimin e albumit të saj të ri. Grupi i saj muzikor megjithatë e nxorri në treg "Pearl". Ky disk u kthye në suksesin më të madh të saj. Kënga e vetme e papërfunduar, kur u botua tingëlloi si ogur i keq: "Varrosur e gjallë në muzikën blues".
Monsieur 100.000 volt
"Falemnderit Gilbert, publiku nuk do të të harrojë kurrë", shkruhet në gurin e varrit të Gilbert Becaud. Fansat vazhdojnë të vizitojnë varrin e tij në varrezën e Parisit, Pere Lachaise, për të nderuar njërin nga yjet e famshëm të këngës franceze. Në përvjetorin e 10-të të vdekjes së tij, në vitin 2011, e veja e tij nxorri në qarkullim kompakt-diskun "I pavdekshëm - këngët e tij më të famshme".
Akoma shumë këngë të pabotuara
"Man in Black" doli në treg 11 vjet pas vdekjes së tij. "Out Among the Stars" doli në qarkullim në mars 2014, por këngët Johnny Cash i kishte hedhur në letër 30 vjet më parë. Pra në ato vite 1980, kur skena e muzikës Country e humbi interesin për të dhe firma që i publikonte disqet u nda prej tij. I biri, John Carter Cash tha se ka ende shumë material të pabotuar, për pesë albume të tjera.
Zëri prej botës tjetër
Pianisti i SHBA dhe këngëtari Nat King Cole ka vdekur që në vitin 1965, por e bija e ringjalli atë në vitin 1991. "Unforgettable" quhej dueti i kombinuar më vonë, të cilin ajo e këndoi me të atin e vdekur. Albumi ku bënte pjesë kjo këngë "Unforgettable … with Love" me këngë të njohura të atit të saj, u shit 14 milionë herë dhe korri shtatë çmime Grammy.
Talent i jashtëzakonshëm, droga dhe një vdekje e hershme
Pas vdekjes së saj më 2011, kërkesat për albumet e Amy Winehouse ishin shumë të mëdha. Megjithë eksceset e drogës, këngëtarja e muzikës soul ishte mjaft produktive në karrierën e saj të shkurtër dhe la të papublikuara mjaft këngë për një kompakt-disk tjetër. "Lioness: Hidden Treasures" zuri menjëherë vendet e para në hitparadën britanike.
Reklamë alla Bolan
Pasi britaniku Marc Bolan e humbi jetën në vitin 1977 si pasagjer në një automjet Mini Cooper, publikimet me muzikën e shpikësit të Glam-Rock-ut kanë qenë biznes fitimprurës. Në vitin 1981 u publikua albumi "You Scare Me To Death", me këngë që këngëtari i Grupit T-Rex i kishte shkruar që në vitin 1966.
Qumësht dhe mjaltë
Kur ish-bitëllsin John Lennon e vranë në vitin 1980, bota kaloi në shok. Vejushës së tij Yoko Ono iu deshën tri vjet për ta vazhduar punën në albumin, për të cilin patën punuar bashkë: "Qumësht dhe mjaltë" ishte pasardhës i "Double Fantasy". Albumi përmban këngë të të dyve, por në një kohë kur Yoko nxorri në këngë gjithë hidhërimin e saj, këngët e tij tingëllonin ende të pambaruara.