Gjenerata e re e terroristëve në Greqi

Ekspertët e sigurisë në policinë greke i kanë gjetur këto paketa të hënën në mbrëmje (20.03) dhe i kanë dërguar për analiza, të cilat do të zgjasin më shumë, deri sa të sigurohen gjurmët e gishtërinjve dhe gjurmët e ADN-së, njofton televizioni Skai. Thuhet se dërgesat postare "kanë qenë të njëjta", ashtu si dy letra-bombë të gjetura në botën e jashtme. Të mërkuren (15.03) u gjet një paket në Ministrinë e Financave në Berlin, ndërsa të enjten (16.03) në Zyrën e Fondit Montetar Ndërkombëtar në Paris. Një bashkëpuntore që e ka hapur letrën është dëmtuar. Presidenti francez François Hollande foli për "atentat". Letrat dhe pakteta janë dërguar nga grupi terrorist grek "Betim i celulave të zjarrit", që është paraqitur në vitin 2008.

Është menduar se ky grup është shkatërruar, pas arrestimit të 60 anëtarëve dhe simpatizantëve të tij. Por ndërkohë sërish ka marrë përgjegjësinë për akte të dhunshme: në tetor 2016 grupi ka vënë një bombë në shtëpinë e një gjykatësi. Të enjten mori përgjegjësinë për dërgimin e paketës në Ministrinë e Financave në Gjermani. Dyshohet se organizata ka edhe plane të tjera.

"Duhet të presim letrat përmes të cilave marrin zyrtarisht përgjegjësinë dhe të analizojmë objektivat e mundshme që mund të jenë në shënjestër", thotë Mary Bossi, profesore e sigurisë në Univeristetin e Pireut. Në Greqi ka një gjeneratë të re të terroristëve të dhunshëm, të cilët përfitojnë nga gjendja e rëndë ekonomike e njerëzve atje. Ajo dallon nga grupi terrorist "17 nëntori", i cili në Greqi ka vrarë 23 persona në periudhën prej vitit 1975 - 2000. "Dikur në shënjestër kanë qenë personat e klasës sunduese. Ndërsa organizata e re terroriste pohon se as njerëzit e rëndomtë nuk janë të pafajshëm, sepse nuk po bëjnë asgjë dhe nuk po çohen në kryengritje", shpjegon Mary Bossi.

Largimi nga marksizëm-leninizmi

 

Grushti i fundit i fuqishëm ndaj terrorizmit në Greqi ka ndodhur në shtator 2014, kur u arrestua kryeterroristi Nikos Maziotis. Dyshohet se grupi i tij "Lufta Revolucionare" ka qenë i përfshirë në sulmet ndaj rezidencës së ambasadës gjermane në vitin 2013. Ndërkohë që nuk dihet nëse ka pasur gisht edhe në sulmin e dështuar në një stacion hekurudhor para pesë vitesh. Për fat, ky sulm arriti të evitohet me kohë. Mary Bossi kritikon mediat të cilat asokohe i kanë quajtur këto grupe si "ekstremiste të majta". "Grupet ndërkohë i kanë thënë lamtumirë marksizëm-leninizmit dhe distancohen qartë nga idetë majtiste. Ata janë betuar për anarki." Por as kjo nuk është tepër e qartë.

Ekspertja paralajmëron edhe nga e ashtuquajtura "Guerila e qytetit" në Greqi, të cilës i përkasin edhe celulat e fundit terroriste. Ato kanë kontakte me grupet e njëjta në Evropë, Rusi dhe Amerikën Latine. Deri tani nuk dihet nëse e kanë mbështetjen e tyre në rastet konkrete.

Pse nuk u zbuluan?

Në një reagim pas ngjarjes në Berlin, ministri grek për Mbrojtjen Qytetare, Nikos Toskas, tha se në dërgesa janë gjetur sasi të vogla të lëndësh shpërthyese. Ky është edhe shkaku pse letrat e dërguara nga Greqia nuk janë identifikuar menjëherë si të dyshimta.