050809 fatah parteitag

Shumëçka ka ndryshuar qysh prej Kongresit të fundit të partisë para 20 vjetësh. Por disa gjëra kanë mbetur: Jaser Arafati, themeluesi i lëvizjes, vazhdon të jetë idol. Ai sot do të ishte 80 vjeç. Pas vdekjes së tij më 11 nëntor 2004 Abas u vu në krye të kësaj lëvizjeje. Presidenti aktual përpiqet të gjejë tani një rrugë të mesme mes traditës dhe së ardhmes.

Abaz do që ta modernizojë Fatah-un me kujdes.

Që të rinjtë të përfshihen në udhëheqje dhe të ketë një program të ri, që nuk bën thirrje shumë shpesh për luftë kundër Izraelit.

“Ne kemi si detyrë paqen me Izraelin. Por ne vëmë si kusht edhe opcionin e qëndresës, që është e dokumentuar në të drejtën tonë ndërkombëtare”, thotë Presidenti i palestinezëve.

Ithtarët e Abasit mbështesin këtë linjë. Hamasi qeverisës në Rripin e Gazës natyrisht jo. Anëtarët e Partisë Fatah ishin penguar qö tö shkonin në kongres në Betlehem:

Zëdhënësi i Hamasit, Ajman Taha, thotë:

“Abas dëshmoi me kongresin e Fatah-ut edhe një herë se ai nuk është presidenti ynë. Ai nuk flet për të gjithë palestinezët”.

Problemin kryesor, konfliktin e brendshëm mes palestinezëve, Fatahu nuk do ta zgjidhë dot me Kongresin e tij.

Lëvizja Fatah shihet më shumë si një lëvizje e korruptuar, që nuk ka ndikim dhe që ka nevojë për reforma. Një reformim i brendshëm i Fatahut është i domodoshëm, mendojnë kritikët dhe ajo duhet bërë pikërisht tani, kur amerikanët po përpiqen të ndërmjetësojnë bisedimet mes autoriteteve palestineze dhe Izraelit.

Lëvizja Fatah nën udhëheqjen e Jaser Arafatit ka kryer operacione të armatosura në territorin izraelit. Në fund të viteve 80-të besnikët e kësaj lëvizjeje ishin në zemër të një kryengritjeje kundër kontrollit izraelit në Gazë dhe në Bregun Perëndimor.

Pas kësaj lidershipi i Fatahut u kthye në territoret e pushtuara për të drejtuar autoriteteve palestineze, që u vendos në bazë të marrëveshjes së Oslos. Por teksa vazhdonte procesi i paqes, militantët e lidhur me lëvizjen kryen sulme mbi objektiva izraelitë.

Akuzat për korrupsion filluan ta dobësonin pozitën e Fatahut tek palestinezët. Kjo solli përçarje të Lëvizjes, e cila u bë shkak për humbjen e zgjedhjeve elektrorale në 2006. Hamasi fiton përballë rivalit të tij duke e nxjerrë atë edhe nga Gaza.

Influenca më e madhe e Fatahut tani për tani është në Bregun Perëndimor. Megjithatë Mahmoud Abas shihet me simpati nga perëndimi si një lider i moderuar, i cili ka shprehur gatishmërinë për të negociuar lidhur me zgjidhjen me dy shtete të krizës në Lindjen e Mesme.

Autor: Tim Janszysky/Mimoza Cika-Kelmendi

Redaktoi: Angjelina Verbica