211011 Euro Finanzminister
22 Tetor 2011
Fillimisht u fol për një shtyerje të samitit, pastaj papritmas me dëshirën gjermano-franceze një ndarje e samitit. Vendimet kryesore për ombrellën e shpëtimit të euros, për shpëtimin e bankave dhe ristrukturimin e borxhit të Greqisë nuk mund të merren para të mërkurës së ardhshme (26.10.). Pak para takimit të ministrave të Financave të grupit të euros të premten (21.10.) në Bruksel, presidenti i eurogrupit, kryeministri i Luksemburgut Jean-Claude Juncker, shprehu fuqishëm pakënaqësinë për kaosin në planifikim.
"Efekti i jashtëm është katastrofik. Ne nuk japim këtu shembullin e duhur të një udhëheqje shtetërore të nivelit të lartë dhe në të ardhmen do të na duhet të shohim, se si do ta ndryshojmë sërish imazhin tonë."
Fondi i shpëtimit - Bankë më vete
Franca dëshiron që fondi i shpëtimit të bëhet praktikisht një bankë. Ajo pastaj do të mund të huazonte para nga Banka Qendrore Evropiane. Por sipas pikëpamjes gjermane kjo do të rriste rrezikun për taksapaguesit. Përveç kësaj Berlini i druhet një inflacioni të mundshëm. Prandaj siç duket ky opcion nuk ndodhet më në tryezën e bisedimeve. Qeveria gjermane në vend të saj kërkon një zgjidhje përmes sigurimit. Fondi i shpëtimit do të mbulonte një pjesë të rrezikut të mosfunksionimit dhe kjo do të inkurajonte investitorët që të blejnë obligacionet e vendeve të goditura nga kriza. Gjithashtu po shqyrtohet edhe mundësia e përfshirjes së FMN-së.
Mosmarrëveshjet me Francën sa i përket të ashtuquajturave "leva" të ombrellës së shpëtimit EFSF janë sigurisht arsyeja përse komisioni për buxhet i parlamentit gjerman nuk ka vendosur ende për këtë çështje.
Pakënaqësi ndaj Francës dhe Gjermanisë
Por Juncker është i zemëruar për faktin se tërë kohën po flitet pothuajse vetëm për dy vende. "Përse mendohet se në fakt do të mjaftonte që të bien dakord Gjermania dhe Franca? Ne kemi të bëjmë me 17 qeveri, me 17 shtete, me 17 parlamente. Nuk ka vetëm në Gjermani dhe në Berlin një parlament, parlamente ka edhe diku tjetër."
Presioni ndaj krerëve të shteteve dhe qeverive të vendeve evropiane për gjetjen më në fund të një zgjidhjeje të përgjithshme është shumë i madh, nëse jo deri të dielën mbrëma, atëherë më së voni deri të mërkurën në mbrëmje.
Autor: Christoph Hasselbach / Esat Ahmeti
Redaktoi: Lindita Arapi