1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW

Kriza e refugjatëve dhe rregullat e stabilitetit të BE-së

PP (afp, dpa, rtr)13 Shtator 2015

Shpenzimet e vendeve të BE-së mund të shkojnë në miliarda për shkak të krizës së refugjatëve. Prandaj ministrat e Financave duan të zbusin rregullat e borxhit të parashikuara në Paktin e Stabilitetit.

https://p.dw.com/p/1GVS4
Fotografi: Getty Images/AFP/D. Roland

Komisioni i BE-së pritet të analizojë ndikimin financiar të krizës së refugjatëve në Evropë. Si njoftoi Presidenca luksemburgase në Luksemburg pas një takimi të ministrave të Financave të BE-së, ajo i ka kërkuar Komisionit një analizë të tillë. Kjo analizë duhet të shqyrtojë nëse kriza e tanishme e refugjatëve mund të konsiderohet si "rast i jashtëzakonshëm" i rregullave të Paktit të Stabilitetit dhe Rritjes, tha ministri i Financave i Luksemburgut Pierre Gramegna.

Kjo do të thotë se rregullat e borxhit mund të zbuten për vendet e prekura veçanërisht për shkak të kostove të tyre për pritjen e refugjatëve. Kështu, vendet mund të kenë më shumë liri veprimi për të arritur objektivat e tyre buxhetore afatmesme. Sipas Paktit të Stabilitetit borxhi i përgjithshëm i një vendi të eurozonës nuk duhet të kalojë 60 për qind të prodhimit të brendshëm bruto (PBB) dhe deficiti aktual nuk duhet ta tejkalojë nivelin e tre për qind të PBB-së. Shtetet anëtare të eurozënës kanë vazhdimisht konflikt me Komisionin Evropian për shkak të respektimit të rregullave të Paktit të Stabilitetit, së fundi edhe Italia dhe Franca.

Euro Finanzminister Treffen in Brüssel 08.12.2014
Fotografi: Reuters/F. Lenoir

Ministri i Financave i Luksemburgut Gramegna tha se shtetet e eurozonës duhet të bëjnë tani shpenzime shtesë p.sh. për strehimin e refugjatëve, integrimin e tyre në tregun e punës apo edhe për çështjet e sigurisë. "Të gjitha këto elemente kanë ndikim në buxhetin e BE-së dhe mbi buxhetet kombëtare", tha Gramegna. "Gjithkush e sheh se një gjendje e tillë mund të klasifikohet si rrethanë e jashtëzakonshme, që parashikohet edhe në Pakt."

Për pyetjen nëse vende të tilla si Gjermania, Austria dhe Finlanda - të cilat kërkojnë gjithmonë respektimin e plotë të rregullave të stabilitetit - e mbështesin këtë kërkesë, Gramegna tha: "Kjo çështje nuk ishte fare e diskutueshme."

Shqyrtimi i pasojave

Komisioneri i BE-së për Çështjet Monetare Pierr Moskovici shpjegoi se shqetësime në lidhje me koston e lartë të krizës së refugjatëve u tematizuan nga Austria, Irlanda dhe Italia. Ai premtoi një analizë të kësaj çështje: "Ne duhet të shqyrtjmë ndikimin ekonomik dhe financiar të krizës ndaj buxheteve të vendeve të caktuara." Ministrat e Financave mund të diskutojnë për këtë në takimin e tyre të ardhshëm në fillim të tetorit.

Banka Evropiane e Investimeve (EIB) rikonfirmoi gatishmërinë e vet për të ndihmuar. Shefi i EIB-së Verner Hojer tha se Banka ka qenë në të kaluarën fleksibil dhe mund dhe duhet të jetë e tillë edhe tani në kohën e "krizës aktuale humanitare".