Lehtësim për Hillary Clinton

Lehtësim për Hillary Clinton: dy ditë para zgjedhjeve, FBI-ja njoftoi se nga kontrolli i e-maileve të zbuluara rishtazi nuk janë gjetur prova për veprime penale të dënueshme të kandidates demokrate.

Asgjë nuk ka ndryshuar nga rezultatet e publikuara në korrik, pas përfundimit të hetimeve të mëparshme, u shkroi drejtori i FBI-së James Comey të dielën (06.11.)  anëtarëve të Kongresit. Në korrik ai kishte arritur në përfundimin se Hillary Clinton kishte vepruar vërtetë në mënyrë jashtëzakonisht të pakujdesshme sa i përket përdorimit të e-mailit privat, por se në korrespondencë nuk ka asgjë që do të justifikonte një ndjekje penale.

Afera e-maileve pengesë për fushatën zgjedhore të Clintonit

Hetimet kishin filluar për shkak se Hillary Clinton në kohën kur ishte ministre e Jashtme e kishte përdorur serverin privat në shtëpinë e saj edhe për korrespondencë zyrtare. Në rast se prej korrespondencës do të konstatohej se një gjë e tillë mund të kishte rrezikuar sigurinë e Shteteve të Bashkuara, ajo mund të ndiqej penalisht.

Afera e-maileve e ka rënduar vazhdimisht fushatën zgjedhore të Clintonit. Edhe më tepër gjendja u acarua kur shefi i FBI-së, James Comey, njoftoi nëntë ditë më parë se në kompjuterin e një ish-deputeti janë gjetur e-maile të reja, që tani do të shqyrtohen. Rivali republikan Donald Trump e përdori këtë lajm për sulme të reja masive kundër kandidates demokrate, diferenca e së cilës ndaj Trumpit ka rënë. Pas lajmit se ndaj Hillary Clintonit nuk do të hapen hetime, Trump tha se ajo është e mbrojtur nga një "sistem i ngurtë".