1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW

Ligj kundër "turizimit për ndihma sociale"

13 Tetor 2016

Qeveria gjermane do të përjashtojë nga sistemi i  ndihmës sociale ata qytetarë të BE-së që nuk kanë punuar kurrë në Gjermani.

https://p.dw.com/p/2R9sw
Buslinie Bukarest-Dortmund 04.01.2014
Fotografi: picture-alliance/dpa

Parlamenti miratoi projektligjin e paraqitur nga ministrja e Çështjeve Sociale, Andrea Nahles  (SPD). Sipas këtij ligji qytetarët e BE-së që vijnë për të jetuar në Gjermani përjashtohen nga përfitimi i ndihmës sociale, në qoftë se ata nuk punojnë në Gjermani ose nuk kanë punuar dikur më parë në Gjermani dhe kanë paguar kontribute për sigurimet shoqërore.

Ligji i ri parashikon edhe për qytetarët e vendeve të BE-së një periudhë prej pesë vjetësh jete dhe pune në Gjermani përpara se të lindë e drejta për përfitimin e ndihmës sociale. Gjithësesi në rast se vijnë në Gjermani me synimin për të gjetur punë, atyre do t'u mundësohet dhënia e një ndihme të përkohshme njëmujore për të gjetur banesë dhe për t'u ushqyer. Po ashtu në rast se ata duan të kthehen në atdheun e tyre, ata kanë të drejtë të marrin një kredi.

Arbeitsministerin Andrea Nahles DW
Fotografi: DW/K. Danetzki

Pengesë për "turizimin për ndihma sociale"

Me këtë hap Nahles do të mbyllë një shteg që është hapur sipas pikëpamjes së saj prej një vendimi të Gjykatës Federale e Punës dhe e Çështjeve Sociale në vitin 2015. Sipas tij personat e papunë nga shtetet e tjera të Bashkimit Evropian kanë të drejtë që të përfitojnë ndihmë sociale, në qoftë se ata kanë jetuar për të paktën gjashtë muaj në Gjermani.

Andrea Nahles synon këtë pengesë të lartë që të shmangë ardhjen e të huajve nga vendet e tjera të BE-së që joshen për të ardhur në Gjermani për shkak të përfitimeve të larta sociale, sqaroi Ministria e Punës dhe e Çështjeve Sociale.

Sipas statistikave vitet e fundit numri i shtetasve rumunë dhe bullgarë që marrin ndihma sociale në Gjermani është rritur me 66 përqind. Megjithatë numrin më të lartë të shtetasve të BE-së që marrin ndihmë sociale në Gjermani e përbëjnë polakët me 92.000 vetë, të ndjekur nga italianët (71.000), bullgarët (70.000), rumunët (57.000) dhe grekët (46.000).

Symbolbild Armutsmigration Europa
Fotografi: imago/epd

Lëvizja e lirë brenda BE-së mbetet e paprekur

Gjykata Evropiane ka theksuar disa herë në vendimet e saj se Gjermania apo shtete të tjera të BE-së kanë të drejtë të vendosin rregulla të tilla kufizuese pa rënë ndesh me të drejtën e lëvizjes së lirë brenda BE-së. Rregulla të tilla synojnë të frenojnë vendosjen nga një vend në një vend tjetër vetëm me synimin për të përfituar ndihma sociale.

Përfaqësuesit e komunave gjermane kërkuan që ky projektligj të hyjë sa më shpejt në fuqi që të mos të jenë të detyruara të përballojnë shpenzime shtesë për ndihmat sociale.

PP (dpa, afp)