1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW

"Një dështim" - Berlini reagon ndaj vetëvrasjes së Al Bakr

13 Tetor 2016

Pas vetëvrasjes në qeli të të dyshuarit për terrorizëm Al Bakr politikanët kërkojnë një zbardhje të plotë të rastit.

https://p.dw.com/p/2RCAf
Deutschland PK zum Tod des Terrorverdächtigen Al-Bakr
Fotografi: picture-alliance/dpa/A. Burgi

Një ditë pas vetëvrasjes në qelinë e burgut  të të dyshuarit për terrorizëm Xhaber Al-Bakr politikanët në Berlin janë të shtangur, të shokuar. Si mund të ndodhte kjo, ndonëse qelia e burgut, ku ndodhej Al Bakr, vëzhgohej intensivisht, kjo është pyetja që shtrohet më së shumti përmes rrjetit Twitter.

Edhe avokati mbrojtës i Al-Bakr, Alexander Hübner, në bisedë me DW u shpreh i habitur. Për të nuk ka asnjë dyshim, që klienti i tij rrezikohej të kryente vetëvrasje. "Që një i rrezikuar nga vetëvrasja nuk e komunikon atë që ka në mendje, kjo është e njohur në psikologji", thotë ai. 

Goditje për hetimet

Al-Bakr të mërkurën në mbrëmje (12.10) e kish varur veten në kangjellat e qelisë me një këmishë që i ishte dhënë në burgun e Lajpcigut. Të martën ai kishte shkulur llambën nga tavani i qelisë dhe kish manipuluar prizat e korentit, po ashtu ai nuk kishte pranuar të hante dhe të pinte. E megjithatë peersoneli i burgut e kishte vlerësuar atë si jo "të rrezikuar akut për vetëvrasje". Sipas të dhënave të drejtorit të burgut Rolf Jacob intervalet e kontrollit për qelinë e Al-Bakr ishin vendosur nga çdo 15 minuta fillimisht në çdo gjysmë ore.

Ministri i Brendshëm Thomas de Maizière (CDU) e konsdieron një dështim vetëvrasjen e Al-Bakr në luftën kundër terrorit. "Me këtë janë vështirësuar hetimet", tha politikani kristiandemokrat në kuadër të një takimi të ministrave të brendshëm të BE-së në Luksemburg. Kjo është një goditje prapaktheu për zbulimin e pjesëmarrësve të tjerë të mundshëm, i personave dhe rrjeteve që qëndrojnë pas.

Politikani kristiandemokrat Wolfgang Bosbach e quajti këtë vetëvrasje si "një tragjedi të vërtetë". Përderisa Al-Bakr me sa duket kishte qenë i gatshëm të flasë, me të humbet një "burim i rëndësishëm informacioni". Ka ende shumë pikëpyetje, përgjigja ndaj të cilave do të ishte e rëndësishme për sigurinë në Gjermani.

Kritika ndaj drejtësisë në landin e Saksonisë

Vëtëvrasja është "një dështim për drejtësinë e saksonisë", sepse kishte dijeni për rrezikshmërinë për suicid të të dyshuarit për terrorizëm, theksoi politikani i partisë ekologjiste Konstantin von Notz. Që "figura kyç" Al-Bakr nuk mund të pyetet më rreth planeve për atentate, është "një dështim edhe për zbardhjen, që duhet të bëjmë ne".

Komisioni i Bundestagut për punët e brendshme në javët e ardhëhsme do të shqyrtojë këtë çështje - madje edhe gabimet e mundshme të policisë në Chemnitz, së cilës i shpëtoi fillimisht nga arrestimi i kërkuari Al Bakr. Sipas Notz synohet që të tilla "gabime të rënda" të shmangen në të ardhmen.

Kërkesa për dorëheqje

Kryetarja e partisë "E Majta" Katja Kipping pas vetëvrasjes së Al-Bakr kërkoi dorëheqjen e ministrit të Drejtësisë të landit të Saksonisë Sebastian Gemkoë (CDU). "Drejtësia në Saksoni është një turp për çdo shtet ligjor", i tha Kipping agjencisë gjermane të lajmeve DPA. Në këtë mënyrë, shtoi ajo, as nuk mund të gjenden personat në prapaskenë dhe as nuk mund të zbardhen informacionet për sfondin e aktit. Ministri i Drejtësisë në Saksoni e ka hedhur poshtë kërkesën për dorëheqje. Për këtë tani për tani nuk ka shkas, deklaroi Gemkow në Dresden.

Edhe sindikata e policisë kërkon një zbardhje të plotë të ngjarjes. Shefi i sindikatës Rainer Wendt kritikoi, që vetëvrasja e Al-Bakr çon tani ujë në mullirin e atyre që krijojnë teori komploti dhe ka pësuar një goditje të rëndë besimi i popullsisë tek shteti.