Opozita akuzon kancelaren Merkel për Gorleben
28 Shtator 2012Pas një seance marrjeje në pyetje prej pesë orësh në komisionin Gorleben deputetët e opozitës e kanë akuzuar kancelaren Angela Merkel se nuk ka thënë të vërtetën. Takimi i këtij komisioni të zhvilluar të enjten në Berlin kishte lidhje me pretendimin se Merkel kishte përdorur në vitin 1995, kur ishte ministre federale e Mjedisit një raport ekspertize për ta klasifikuar Gorleben si "zgjedhjen e parë" për ruajtjen e mbeturinave bërthamore, edhe pse kjo nuk ishte objekt i këtij studimi.
Angela Merkel ishte nga viti 1994 deri 1998 ministre për Mjedisin dhe në këtë funksion edhe përgjegjëse për kërkimin e një kompleksi për depozitimin e mbetjeve radioaktive. Sipas opozitës në kohën e mandatit të saj si ministre e Mjedisit Angela Merkel e kishte interpretuar një ekspertizë të Institutit Federal të Shkencave për Tokën dhe Burimeve Natyrore (BGR), "në kundërshtim me të vërtetën" si një vlerësim krahasues në lidhje me përshtatshmërinë e Gorleben si një vend për ruajtjen e mbeturinave bërthamore, edhe pse Gorleben nuk ishte objekt i ekspertizës.
Kancelarja Merkel e hodhi poshtë këtë akuzë. Sfondi është një raport i BGR-së, në të cilin bëhej fjalë për alternativat e mundshme për vendin e depozitimit të mbeturinave bërthamore Gorleben, nëse ky do të rezultonte si i papërshtatshëm për magazinimin e mbetjeve bërthamore.
Deputetja e partisë E majta Dorothee Menzner tha: Koncernet që ofrojnë furnizim me energji dhe që duhej të paguanin procesin e kërkimit të një vendi tjetër për depozitimin e mbeturinave bërthamore, kanë ushtruar presion. Ato propozuan atë kohë që në fillim të vendosej një moratorium për ta ndaluar një herë punën. Prandaj duhet supozuar me forcë se ky presion që u bë, ka ndikuar edhe veprimet ".
Kurse deputetja e Partisë së Gjelbër Sylvia Kotting-Uhl u shprehu pas takimit të komisionit: "Jo, ajo nuk më bindi, sepse ajo e ka ndryshuar konceptin që ekzistonte deri atëherë. Nën drejtimin e saj u ndryshua krejtësisht plani i eksplorimit. Nga një zonë shumë e gjerë, që përfshinte si jugperëndimin si edhe verilindjen, plani u fragmentua dhe u planifikua që të shqyrtohej vetëm verilindja."
Mes qeverive federale dhe atyre të landeve ka konsensus se Gorleben duhet të vazhdojë të qëndrojë në planin për përzgjedhjen e një vendi për depozitimin e mbeturinave bërthamore.