NPD dështon në Gjykatën Kushtetuese
5 Mars 2013Partia ekstremiste e djathtë Nacionaldemokratike (NPD) dështoi me përpjekjen e vet që Gjykata Kushtetuese Gjermane t'i çertifikonte se kjo parti është besnike ndaj kushtetutës. Një konstatim i tillë nuk parashikohet në ligj, vendosi gjykata në Karlsruhe. Me këtë inkursion NPD-ja kishte reaguar ndaj paralajmërimit të landeve gjermane, për të kërkuar në Gjykatën Kushtetuese ndalimin e kësaj partie. Përveç kësaj gjykatësit hodhën poshtë akuzën e NPD-së se debati aktual për ndalimin e partisë ndikon faktikisht si një ndalim i kësaj partie. Organeve shtetërore nuk u ndalohet të debatojnë me objektivitetin e nevojshëm lidhur me argumentet pro dhe kundër procesit për ndalimin e partisë, theksoi gjykata.
Partia Nacionaldemokratike kishte argumentuar se me pretendimin e vazhdueshëm të Parlamentit gjerman (Bundestag), të Dhomës së landeve të Parlamentit (Bundesrat) dhe të qeverisë gjermane shkeleshin të drejtat e NPD-së si parti. Dhoma e landeve e Parlamentit ka miratuar një mocion për ndalimin e NPD-së, i cili do t'i dorëzohet në muajt e ardhshëm Gjykatës Kushtetuese.
Autor: Elert Ajazaj (dpa)
Redaktoi: Auron Dodi