Separatistët shkaktojnë prapambetje ekonomike për Donbassin
20 Qershor 2014Kriza politike që po zgjat në Ukrainë ka ushtruar efekt negativ në përgjithësi në ekonominë e vendit. Por prej të gjitha rajoneve në Ukrainë, rajoni i Donbassit në juglindje të vendit i vuan më tepër pasojat.
Sipas të dhënave të Departamentit të Donetskut të Zyrës Ukrainase të Statistikave, humbjet e sipërmarrjeve të rajonit në katërmujorin e parë të 2014-ës ishin rreth 37 përqind mbi mesataren e vendit. Humbjet në Donbass llogariten vetëm në tri muajt e parë të këtij viti me 1,8 miliardë euro, gjë që është një shumë më e madhe se e gjithë periudha e mëparshme (1,3 miliardë euro). Prodhimi industrial në rajon, në krahasim me të njëjtën periudhë të vitit të kaluar ra me 13 përqind. Shkaku për këtë ka të bëjë me pakësimin e porosive për eksport si dhe me një kërkesë më të dobët në tregun e brendshëm.
Uzinat e mëdha vazhdojnë të prodhojnë
Fabrikat e mëdha në rajonin e Ukrainës Lindore sipas të dhënave të tyre për momentin prodhojnë si më parë. Por parashikimet për muajt e ardhshëm janë të errëta. "Akoma puna vazhdon normalisht. Por gjendja e porosive është keqësuar. Cili i huaj do të vijë tek ne, kur i duhet të kapërcejë 13 barrikada rrugësh?" i thotë DW Volodimir Shulij, drejtues i sektorit të marketingut në "Fabrikën e Makinerive Novo-Kramatorsk". Qyteti Kramatorsk ndodhet në rajonin, ku trupat qeveritare kryejnë operacionin e tyre antiterror. Që prej prillit ato luftojnë në rajonet juglindore të Donetskut dhe Luhanskit kundër separatistëve prorusë.
Juri Makohon, nga Instituti Kombëtar i Studimeve strategjike, i thotë DW se fabrikat e Ukrainës lindore janë të orientuara me produktet e tyre drejt tregut rus. Por ky treg faktikisht ka humbur. "Vëllimi i shkëmbimeve tregtare midis Rusisë dhe rajonit të Donetskut që prej fillimit të vitit ka shënuar rënie masive", thotë Makohon. Vështirësi të mëdha i shkaktojnë industrisë dhe transportit të mallrave dëmet në sistemin hekurudhor në zonat e luftimeve. Fluturime thuajse nuk ka.
Sipërmarjet e vogla dhe të mesme e ndiejnë më fort barrën. Gjysma e firmave u detyruan t'i mbyllin dyert javët e fundit, prej tensioneve në rritje. Dyqanet bastisen prej separatistëve dhe ndaj sipërmarrësve ushtrohet shantazh. Prandaj shumë sipërmarrje të vogla janë larguar nga rajoni, për të shpëtuar nga sulmet e banditëve të së ashtuquajturës "Republikë Popullore e Donetskut."