Serbët e veriut bllokojnë vendkalimin kufitar në Jarinje
4 Dhjetor 2012Disa qindra serbë të veriut të Kosovës që në orët e para të mëngjesit të ditës së martë janë tubuar afër vendkalimit kufitar në Jarinje, ndërmjet Kosovës dhe Serbisë, për të protestuar kundër zbatimit të marrëveshjes për menaxhimin e integruar të kufirit Kosovë-Serbi, e njohur si IBM. Serbët po mbajnë të bllokuar këtë pikë kufitare. Protesta e serbëve të veriut ndodhi në ditën, kur kryeministri i Kosovës, Hashim Thaçi dhe ai i Serbisë, Ivica Dacic, takohen në Bruksel për të tretën herë për të jetësuar zbatimin e marrëveshjes për menaxhimin e integruar të kufirit Kosovë-Serbi.
Protesta zhvillohet në zonën e gjelbër
Zëdhënësi i Policisë në Mitrovicë, Besim Hoti, konfirmon se protesta e serbëve po zhvillohet jashtë kufirit të Kosovës, në zonën e gjelbër.
“E tëra, që po ndodh, është në hapësirën e ndërmjetme, e njohur si zona e gjelbër, por më shumë në territorin e Serbisë. Në hapësirën tokësore të Kosovës nuk ka asgjë”, thotë zëdhënësi Besim Hoti.
Edhe zyrtarë të forcave paqeruajtëse konfirmojnë se protesta e serbëve po zhvillohet në zonën e gjelbër ndërmjet kufirit Kosovë-Serbi.
Mediat lokale serbe citojnë kryetarin e kuvendit paralel të komunës së Leposaviqit, Slavko Stevanoviq, të ketë thënë se serbët e veriut do ta kundërshtojnë në çdo formë zbatimin e marrëveshjes së IBM-së, ndërmjet Kosovës dhe Serbisë.
“Deputetët e katër komunave të veriut të Kosovës, Leposaviqit, Zubin Potokut, Zveçanit dhe veriut të Mitrovicës, janë tubuar për ta treguar pakënaqësinë e tyre dhe se nuk e pranojnë doganën dhe kufirin ndërmjet veriut të Kosovës dhe Serbisë”, citohet të ketë thënë Sllavko Stevanoviq.
Autoritetet në Kosovë dënojnë protestën
Reagimin e një mase të serbëve të veriut në pikën kufitare ndërmjet Kosovës dhe Serbisë në Jarinje e ka dënuar presidentja e Kosovës, Atifete Jahjaga. Ajo thotë se kjo dhunë çon drejt përshkallëzimit të situatës dhe dëmton përpjekjet e institucioneve të Kosovës dhe atyre ndërkombëtare për të vendosur rendin dhe ligjin dhe për të garantuar një jetë normale për qytetarët, që jetojnë në veri të Kosovës.
“Marrëveshja për Menaxhimin e Integruar të Kufirit (IBM), ndërmjet Republikës së Kosovës dhe Republikës së Serbisë, garanton stabilitet për të dyja shtetet, fuqizon sundimin e rendit dhe të ligjit në vendkalimet kufitare, si dhe ndihmon në normalizimin e marrëdhënieve ndërshtetërore. Kjo marrëveshje siguron qarkullimin e lirë të mallrave në përputhje me normat ndërkombëtare”, thotë presidentja Atifete Jahjaga.
Sidoqoftë zyrtarë të forcave paqeruajtëse thonë se tash për tash pika kufitare Kosovë-Serbi në Jarinje vazhdon të mbahet e bllokuar nga serbët lokale, ndërsa në pjesën e Kosovës, deri ku është përgjegjësia e kontrollit nga trupat e KFOR-it, nuk janë shënuar incidente.