Shpresëdhënës apo zgjidhje e përkohshme?
9 Shkurt 2012Emërimi i Mihai Razvan Ungureanut në postin e kryeministrit të Rumanisë nuk shkaktoi habi vetëm tek opozita social-liberale rumune. Ajo kishte parandjerë diçka që pas dorëheqjes së kryeministrit Emil Boc e qeverisë së tij (06.02) dhe kërkoi njëherësh edhe dorëheqjen e presidentit Basescu. Përveç kësaj, duhej të krijohej një qeveri e përkohshme ekspertësh, sipas kërkesave të opozitës, me qëllim që të organizoheshin zgjedhjet e parakohshme. Kjo kërkesë me sa duket do të mbetet e parealizuar.
Por edhe koalicioni i qendrës me të djathtët, të cilët kanë një mazhorancë të brishtë në parlament, reagoi me habi ndaj emërimit të Mihai Razvan Ungureanut pa parti. Koalicioni do të kishte dëshiruar - sidomos në këto kohë krize ekonomike dhe në kuadër të zgjedhjeve parlamentare në Nëntor 2012 - që të vazhdonte punën me një ekip të ri e me një kryetar qeverie nga radhët e veta, deri në ditën e votimit.
Shpresëdhënësi i elitës politike
Por presidenti vendosi ndryshe. Me Mihai Razvan Ungureanun, një historian dhe profesor universiteti, Basescu ka nxjerrë në pararojë një politikan me premisa të mira nga elita e re politike rumune. Vala e parë e irritimit kaloi: Kryeministri i emëruar ka bërë të ditur se ministrat e rinj të kabinetit të tij do të zgjidhen si edhe më parë nga partnerët e koalicionit. Edhe politika ekonomike e qeverisë së mëparshme, e miratuar si nga FMN-ja, ashtu edhe nga BE, do të vazhdojë të jetë po ajo, madje me nota më të përfocuara. Kështu është shprehur Mihai Razvan Ungureanu.
Reformat e tjera, veçse do të shkojnë paralelisht me përmirësimin e kushteve të jetesës, premtoi presidenti Traian Basescu gjatë prezantimit të kreut të ri të qeverisë. Me këtë mesazh presidenti rumun synon të ulë tensionet e krijuara brenda kabinetit të tij konservator. Mijëra vetë demonstruan në Budapest e metropole të tjera javët e shkuara kundër presidentit dhe qeverisë për shkak të shkurtimeve masive të rrogave dhe rritjes së taksave.
Manovër taktike zgjedhore
Për shkak të rënies drastike të renditjeve në sondazhet e fundit, këto njoftime sigurisht bëhen edhe për taktikë zgjedhore. Në një kohë që partia konservatore PDL (Partia Liberal Demokratike) merr vetëm 20% të preferueshmërisë së votuesve së fundmi, kundërshtari opozitar, Partia USL (Unioni Social-Liberal) kap shifrën e 50%-it. Për presidentin nga radhët e konservatorëve, këto janë rezultate të pakënaqshme në mandatin e dytë dhe të fundit të tij. Nxitimi, me të cilin Basescu vendosi për kandidatin e tij, tregon se pas vendimit fshihet taktika zgjedhore.
Kryeministri i dorëhequr, Emil Boc, kryetar i PDL-s do të duhet tanimë ta drejtojë partinë e tij, - larg punës së përditshme të qeverisë - drejt ujërave më të qeta dhe ta përgatisë për fushatën e re zgjedhore. Por këtu bëhet fjalë për më shumë - për besueshmëri. Protestat e rrugës kanë treguar se shumë vetë kanë humbur besimin tek presidenti, qeveria dhe opozita. E gjithë klasa politike perceptohet si e paaftë dhe e korruptuar nga qytetarët. Tani është në dorën e kryeministrit të ri dhe kabinetit të tij të kthejë një pjesë të besimit të humbur. Në fund pastaj janë zgjedhësit ata që vendosin, nëse Mihai Razvan Ungureanu i përmbushi pritshmëritë ndaj një politikani me perspektivë, apo dështoi si kryetar i një qeverie të përkohshme.
Autor: Robert Schwartz/Lindita Arapi
Redaktoi: E. Xhani