Si jetojnë sot serbët në Kosovë?

Përfaqësuesja e serbëve të Kosovës qendrore Rada Trajkoviq, thotë për Deutsche Wellen se kohët e fundit është shënuar çtendosje e dukshme, sa i përket lirisë së lëvizjes së serbëve. Trajkoviq pohon se ende nuk ekziston e drejta e plotë, për punë dhe e drejta e pronës. Por gjatë procesit të decentralizimit janë krijuar edhe komuna të reja serbe. "Kjo na jep të drejtën të besojmë, se një pjesë e përgjegjësisë për mbetjen e serbëve këtu kalon tek liderët e vetë serbëve të Kosovës".

Në anën tjetër, Marko Jakshiq, nënkryetar i Kuvendit të komunave serbe, pohon se pozita e serbëve në Kosovë është dyfish më e keqe se para dy vitesh. "Këtë gjendje të keqe dëshmojnë mungesa e perspektivës, lirisë së lëvizjes dhe mungesa e të gjitha gjërave që karakterizojnë jetën e serbëve. E të mos harrojmë faktin se pavarësia e Kosovës është krijuar mbi bazat e bombardimit të shtetit serb".

Pavarësia e Kosovës nuk shkaktoi shpërnguljen e serbëve

Përfaqësuesit e institucioneve të Kosovës janë të mendimit të kundërt. Ilir Deda, drejtor i Institutit për hulumtime politike dhe zhvillimore, shpjegon se pavarësia e Kosovës nuk shkaktoi shpërnguljen masive të serbëve. Ndërkohë që është përmirësuar gjendja e sigurisë dhe lirisë së lëvizjes së serbëve. Ai pohon, se ekziston edhe bashkëpunimi i institucioneve të Kosovës me përfaqësuesit e serbëve në veri të vendit.

Nga buxheti i Kosovës për këtë pjesë në vit ndahen rreth shtatë milionë euro. Paguhen edhe rrogat për 500 anëtarë të administratave komunale në këtë pjesë të vendit. Deda pohon se dështimi i strategjisë së qeverisë kosovare për integrimin e pjesës veriore, do të hapte debatet për ndarjen e vendit.

Të gjithë duhet t'i kthehen Bashkimit Evropian

Rada Trajkoviq është kundër ndarjeve të reja në Ballkan, me shpjegimin se të gjithë duhet t'i kthehemi Bashkimit Evropian. "Më i domosdoshmi këtu është normalizimi i raporteve. Sipas historisë që unë kam mësuar, Ballkani gjithmonë ka qenë multietnik. Prandaj nuk e kuptoj se pse kemi nevojë për argumentimet që e përjashtojnë integrimin në një shkallë të caktuar të veriut të Kosovës në Kosovë," thekson Trajkoviq.

Në anën tjetër Marko Jakshiq, pohon se institucionet e Serbisë në veri nuk janë paralele. Ai pohon se serbët kurrë nuk do ta njohin pavarësinë e Kosovës. Rada Trajkoviq përgjigjet se gjenerata e tanishme nuk mund ta njohë pavarësinë e Kosovës, por kjo nuk do të thotë se nuk mund të pranojë edhe shansin që të jetojë dhe mbijetojë në Kosovë.

Autor : Zylfije Jakupi

Redaktoi : Aida Cama