1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW

Van Rompuy: Rendi dhe ligji një prej prioriteteve më të rëndësishme në Kosovë

6 Korrik 2010

Presidenti i Bashkimit Evropian, Herman Van Rompuy, tha në Prishtinë se rendi e ligji janë vlera përcaktuese të BE-së dhe duhet të jenë prioritete për Kosovën. Ai mbështeti misionin EULEX, që po arrin rezultate.

https://p.dw.com/p/OBsV
Herman Van RompuyFotografi: AP

Presidenti i Bashkimit Evropian, Herman Van Rompuy, u kërkoi autoriteteve kosovare që të vazhdojnë me reforma bazuar në vlerat evropiane dhe këto reforma sipas tij janë thelbësore për zhvillimin e Kosovës dhe perspektivën e saj evropiane. Herman Van Rompuy, në kuadër të vizitës së tij në rajonin e Ballkanit, në Prishtinë takoi së bashku udhëheqësit e institucioneve të Kosovës dhe në një takim tjetër përfaqësuesit e misionit EULEX. Këto takime u zhvilluan me dyer të mbyllura, që pasuan në fund me një deklaratë të presidentit të BE-së.

“Rendi dhe ligji janë një prej vlerave përcaktuese të BE-së dhe një prej prioriteteve më të rëndësishme në Kosovë. Misioni EULEX, ka arritur rezultate të mira”, tha Herman Van Rompuy.

Eulex Logo
Logo Eulex (European Union Rule of Law Mission Kosovo)

“Aktivitetet e misionit EULEX, tregojnë përkushtimin e fuqishëm të BE-së, në luftën kundër krimit të organizuar dhe korrupsionit. Misioni EULEX e ka mbështetjen e të gjithë mekanizmave të BE-së dhe unë jam krenar me arritjet e këtij misioni në Kosovë. Ju jeni duke bërë një punë të vlefshme dhe të rëndësishme dhe shumëherë në rrethana jashtzakonisht të vështira”, tha Herman Van Rompuy. Presidenti i BE-së, nuk pranoi t'u përgjigjet pyetjeve të gazetarëve, sikundër as udhëheqësit e institucioneve të Kosovës nuk u paraqiten para mediave.

KS diskuton sot për Kosovën

Herman Van Rompuy po qëndron në Kosovë në ditën, kur në KS-it do të zhvillohet një seancë e jashtëzakonshme e thirrur nga Serbia dhe ku do të diskutohet për incidentet e fundit me viktima, që ndodhën në veri të Mitrovicës. Herman Van Rompuy para së të vijë në Kosovë i dënoi këto incidente. Presidenti i Kosovës, Fatmir Sejdiu, lidhur me seancën e KS-it thotë se nuk do të jetë i qëndrueshëm synimi i Serbisë, që në KS-it ta paraqes Kosovën si një vend jostabil.

UN Sicherheitsrat
Këshilli i SigurimitFotografi: AP

“E dimë se Serbia si gjithmonë deri tash ka bërë përpjekje që të gjejë grimca të caktuara për të demonstruar sipas saj që Kosova nuk mund të jetë një vend i qëndrueshëm”, thotë presidenti Sejdiu.

Në seancën e KS-it për Kosovën, e cila nuk është e hapur për media nga Serbia merr pjesë presidenti serb Boris Tadic, ndërsa nga Kosova merr pjesë shefi i diplomacisë kosovare Skender Hyseni dhe shefi i UNMIK-ut, Lamberto Zannieri.

Autor: Bekim Shehu

Redaktoi: Angjelina Verbica