Vulat me mbishkrimin "Dogana e Kosovës " - Marrëveshja mes Beogradit dhe Prishtinës

Ekipet negociuse të Beogradit dhe Prishtinës kanë arritën të premten (02.09.2011)  në Bruksel një marrëveshje për "vulat doganore të Kosovës“,  ku do të shënohet vetëm dogana e Kosovës pa emëtime të tjera si Republika e Kosovës, apo shenja të tjera të autoriteteve në Prishtinë.

Shefi i delegacionit serb Borislav  Stefanovic dhe drejtuesja e ekipit të Prishtinës Edita Tahiri thanë për mediat se është arritur marrëveshje edhe për kadastrat.

Nga BE-ja u njoftua se delegacionet kanë rënë dakord për lëvizjen e lirë të mallrave dhe se do të pranohet vula "doganës së Kosovës", si rezultat embargoja reciproke tregtare do të hiqet.

"Ky është një hap i rëndësishëm për përmirësimin e marrëdhënieve në rajon dhe sigurimin e Lëvizjes së lirë të mallrave në përputhje me vlerat evropiane ", thuhet në komunikatën e dalë nga takimi, të cilin e kryesoi ndërmjetësuesi i BE-së Robert Kuper

Edita Tahiri u tha gazetarëve se "kontrollin doganor dhe policor sigurisht do ta kryejnë autoritetet e qeverisës ë Kosovës."

Kreu i delegacionit të Serbisë Borislav Stefanovic, kishte deklaruar më parë seSerbia nuk do të pranojë doganën e Kosovës në pikëkalimet administrative.

Tahiri tha se me gjithë mosmarrëveshjet dhe atmosferën e rëndë, në bisedime është gjetur një zgjidhje, siç pohoi ajo, në të mirën e popullit të Kosovës, të Serbisë dhe të rajonit.

 Tahiri  ashtu si më parë Stefanovic, tha se raundi i ardhshëm i dialogut pritet në fund të shtatorit. Ajo tha se të shtunën në Bruksel duhet të mblidhet grupi për zbatimin e planit operativ për marrëveshjet e arritura, për lirinë e lëvizjes dhe regjistrat kadastralë.

Autor: Marina Maksimovic/Angjelina Verbica

Redaktoi: Vilma Filaj-Ballvora