1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW

Westerwelle: Gjermania përkrah përpjekjet e Shqipërisë drejt BE

Arben Muka22 Shkurt 2013

Ambasadori i Shqipërisë në Berlin, Valter Ibrahimi e sheh vizitën e Ministrit të Jashtëm gjerman Guido Westerwelle si një ngjarje të rëndësishme dhe konfirmim të marrëdhënieve të shkëlqyera mes Tiranës e Berlinit.

https://p.dw.com/p/17i6e
Guido Westerwelle
Guido WesterwelleFotografi: picture-alliance/dpa

Ministri i Jashtëm gjerman Guido Westerwelle viziton për herë të parë Tiranën ditën e enjte. Në deklaratën e Ministrisë së Jashtme gjermane pak para nisjes së vizitës së ministrit të Jashtëm gjerman Guido Westerwelle në Tiranë theksohet se që nga fillimi i procesit të demokratizimit marrëdhëniet mes Shqipërisë dhe Gjermanisë janë thelluar vazhdimisht. Ministria e Jashtme Gjermane përmend se Shqipëria është një nga pikërëndesat e bashkëpunimit gjerman për zhvillimin.

Para vizitës në Tiranë dhe të premten në Shkup, ministri i Jashtëm gjerman deklaroi se "Gjermania i mbetet besnike perspektivës europiane të Ballkanit Perëndimor. Gjermania përkrah përpjekjet e Shqipërisë dhe Maqedonisë në drejtim të BE-së, po ashtu si të gjitha vendeve të tjera të Ballkanit Perëndimor. Prandaj është shumë e rëndësishme që kushtet dhe premisat që lidhen me këtë perspektivë të plotësohen në mënyrë të bindshme dhe të besueshme. Shteti i së drejtës, zgjidhja e konflikteve në frymën e bashkëpunimit fqinjësor si edhe bashkëjetesa paqësore janë themelore për zhvillim të mirë të rajonit."

Ministri i Jashtëm i Republikës Federale të Gjermanisë Guido  Westerwelle pritet t'i zhvillojë bisedimet me përfaqësuesit më të lartë të qeverisjes dhe opozitës në Shqipëri ditën e premte. Pas bisedimeve me homologun shqiptar Edmond Panariti, shefi i diplomacisë gjermane do të bisedojë dhe me Presidentin e Republikës Bujar Nishani, Kryeministrin Sali Berisha dhe kryetarin e Partisë Socialiste Edi Rama.

Marrëdhëniet bashkëpunuese mes Tiranës dhe Berlinit, procesi i integrimit europian të Shqipërisë dhe marrja e statusit të vendit kandidat për në BE, realizimi i programeve zhvilluese të Gjermanisë për Shqipërinë - do të jenë ndër çështjet kryesore që Guido  Westerwelle do të diskutojë me mikëptitësit vendorë.

Ambasadori i Shqipërisë në Berlin, Valter Ibrahimi
Ambasadori i Shqipërisë në Berlin, Valter IbrahimiFotografi: Ibrahimi

Valter Ibrahimi: Vizita është shprehje e vëmendjes dhe mbështetjes gjermane

Ambasadori i Shqipërisë në Berlin Valter Ibrahimi e cilëson vizitën e ministrit Westerwelle si një ngjarje të rëndësishme  dhe konfirmim të marrëdhënieve të shkëlqyera mes Tiranës e Berlinit. Ai thotë se vizita zhvillohet në kuadër të një turi rajonal dhe vjen në një moment shumë të rëndësishëm për Shqipërinë dhe rajonin. Vizita është shprehje e vëmendjes dhe mbështetjes gjermane në kuadrin e procsit të afrimit të Shqipërisë dhe vendeve të tjera të rajonit me Bashkimin Europian. Gjermania dhe ministri i Jashtëm, Westerwelle në mënyrë të vazhdueshme dhe substanciale kanë mbmështetur Shqipërinë në rrugën e saj të zhvillimit social-ekonomik dhe integrimit në strukturat euroatlantike dhe evropiane.

Edmond Haxhinasto dhe Guido Westerwelle pas takimit në Berlin, nëntor, 2011
Edmond Haxhinasto dhe Guido Westerwelle pas takimit në Berlin, nëntor, 2011Fotografi: Auswärtiges Amt Deutschland

Gjermania mbështetëse e fortë e Shqipërisë

Në një intervistë për DW muajin e kaluar ambasadorja e Republikës Federale të Gjermanisë në Shqipëri, Carola Müller-Holtkemper, duke folur për marrëdhëniet dy palëshe u shpreh se "vlerësuar që prej fillimit të bashkëpunimit tonë për zhvillim, bashkëpunimi gjerman tekniko-financiar në nivel dypalësh së bashku me kontributin e Gjermanisë në kuadër të asistencës shumëpalëshe arrin në më shumë se një miliardë euro". Sipas saj, sektorët kryesorë, ku përqëndrohen projektet mbështetëse janë energjia, ujësjellës - kanalizimet, mbështetja për sipërmarrjet e vogla e të mesme dhe qeverisja e mirë.