Habari za Ulimwengu | DW
default

Taarifa ya Habari za Ulimwengu kutoka Idhaa ya Kiswahili ya DW

Habari | 24.02.2018 | 15:00

Uturuki yashistushwa na uamuzi wa Marekani kufungua ubalozi wake Jerusalem mwezi Mei

Uturuki imesema hatua ya Marekani kufungua ubalozi wake wa Israel mjini Jerusalem mwezi Mei katika siku ambayo inaendana na kumbukumbu ya miaka 70 tangu kuanzishwa kwa Israel kuwa ni suala "linalostua zaidi". Tangazo la jana Ijumaa la Marekani la kuhamisha ubalozi wake kutoka mjini Tel Aviv kwenda katika mji unaozozaniwa wa Jerusalem, linafuatia hatua ya Rais Donald Trump kuitambua rasmi Jerusalem kama mji mkuu wa Israel mwezi Disemba mwaka jana. Wizara ya mambo ya nje ya Uturuki katika taarifa yake imesema hatua hiyo inaashiria nia ya Marekani ya kuendelea kuvuruga hali ya amani katika eneo hilo la mashariki ya kati. Palestina ambayo inatarajia kufanya mashariki mwa Jerusalem kuwa mji wao mkuu watakapotambuliwa rasmi kuwa taifa imelaani tangazo hilo la kufunguliwa ubalozi wa Marekani ikisema ni jambo lisilokubalika huku Waziri Mkuu wa Israel Benjamin Netanyahu akisifu hatua hiyo.

Uturuki yautaka ulimwengu kukemea mauaji katika mji wa Mashariki wa Ghouta

Wakati baraza la Usalama la Umoja wa Mataifa likitarajiwa kupiga kura hii leo kuamua juu ya usitishwaji mapigano nchini Syria Uturuki imetoa mwito kwa jumuiya ya kimataifa kuhakikisha kuwa inachukua hatua ya kukomesha mauaji katika mji unaoshikiliwa na waasi katika eneo la Ghouta Mashariki. Ibrahim Kalin, msemaji wa rais wa Uturuki, Recep Tayyip Erdogan, amethibitisha kupitia katika ukurasa wa Twitter na kusema ulimwengu unapaswa kusema kwa pamoja juu ya kusitishwa kwa mauaji hayo. Shirika la waangalizi wa haki za binadamu lenye makao yake nchini Uingereza limesema mashambulizi mapya yamelenga eneo hilo la mashariki la Ghouta leo Jumamosi na kusababaisha kuongezeka kwa vifo vya raia katika kipindi cha siku saba cha mashambulizi makali na kufikia zaidi ya 500 wakiwemo watoto zaidi ya 120. Baraza la Usalama la Umoja wa Mataifa jana Ijumaa lilitarajiwa kupiga kura juu ya azimio la usitishwaji mapigano kwa muda wa siku 30 ili kuruhusu ugawaji wa misaada ya kiutu pamoja na kuwaondoa raia lakini tofauti za kidiplomasia zimechelewesha kura hiyo ambayo inatarajiwa kufanyika hii leo.

Korea Kaskazini kutuma ujumbe wa maafisa wanaouhusika na silaha za nyukilia Seoul

Wanadiplomasia wa Korea Kaskazini wanaohusika na majadiliano kuhusiana na mpango wa silaha za nyukilia wa nchi hiyo ni miongoni mwa ujumbe unaotarajiwa kuhudhuria hafla ya kuhitimisha kumalizika kwa michezo ya majira ya baridi ya Olimpiki hapo kesho katika mji wa Seoul nchini Korea Kusini. Kwa mujibu wa shirika la habari la Yonhap, si kawaida Korea Kaskazini kutuma maafisa wa ngazi ya juu katika matukio muhimu nchini Korea Kusini. Uamuzi wa kutuma maafisa katika hafla ya kesho mjini Seol ikiwa ni pamoja na vikosi vya Korea Kusini na Korea Kaskazini kuambatana pamoja wakati wa hafla ya ufunguzi, umeibua uvumi kuwa kiongozi wa Korea Kaskazini, Kim Jong Un, anaweza akakubali kufanya majadiliano kuhusiana na mpango wa silaha za nyuklia wa nchi hiyo. Rais Donald Trump wa Marekani hapo jana Ijumaa katika ukurasa wake wa Twitter alionya juu ya awamu ya pili ya vikwazo dhidi ya Korea Kaskazini iwapo kiongozi wa nchi hiyo, Kim Jong Un, hatasitisha mipango yake ya silaha za nyuklia.

Anayeongoza kampeni ya kupinga serikali mpya ya muungano Ujerumani bado hajapiga kura

Kiongozi anayeoongoza kampeni ya kushawishi wanachama wa chama cha Social Democrats nchini Ujerumani - SPD kupiga kura kukataa chama hicho kuunda serikali mpya ya muungano na vyama vya kihafidhina vya Kansela Angela Merkel, bado hajapiga kura yake katika kura ya maoni inayoendelea sasa ndani ya chama hicho. Wanachama 460,000 waliosajiliwa wa chama cha SPD kinachofuata siasa za wastani za mrengo wa kushoto wameombwa kujitokeza kupiga kura ili kuamua iwapo kuna haja ya chama hicho kuunda serikali hiyo mpya ya muungano. Kevin Kuehnert, mwenye umri wa miaka 28 mwanachama wa chama cha SPD na ambaye pia ni kiongozi wa kundi la vijana anayeongoza kampeni ya kuhamasisha kura ya hapana ndani ya chama hicho hadi sasa hajapiga kura kutokana na kuendelea na kampeni hiyo. Kura ya maoni ndani ya SPD kuamua kuunda serikali mpya ya muungano na chama cha kihafidhina cha Kansela Merkel cha Christian Democratic Union-CDU pamoja na chama ndugu cha CSU ilianza Jumanne iliyopita na matokeo ya kura hiyo yanatarajiwa kutangazwa Machi 4.

Wanawake washindi wa tuzo ya amani ya Nobel kukutana na Warohingya

Wanawake watatu washindi wa tuzo ya amani ya Nobel wameanza safari ya wiki moja kuelekea Bangladesh kwa ajili ya kukutana na wanawake wa jamii ya Rohingya, ambao waliteswa na kubakwa na wanajeshi wa Mynamar kabla ya kukimbilia Bangladesh. Wakati wa safari hiyo iliyoanza leo Jumamosi , Shrin Ebadi kutoka Iran, Tawakkol Karman wa Yemen na Maired Maguire wa Ireland ya Kaskazini watatathimini hali inayowakabili wakimbizi wa Rohingya pamoja na vurugu dhidi ya wanawake, ikiwa ni kwa mujibu wa mtandao wa wanawake sita unaoundwa na washindi wa tuzo ya amani ya Nobel ulioanzishwa mwaka 2006. Katika ujumbe wake wa barua pepe kwa shirika la habari la Associated Press ,Karman amesema wako pamoja na wanawake wa Rohingya waliolazimika kuyakimbia makazi yao na kutoa mwito wa kusikilizwa kwa sauti za wanawake wa Rohingya. Tangu Agosti, kiasi cha Waislamu 700,000 wa jamiii ya Rohingya wamekimbia vurugu zinazosababishwa na jeshi katika nchi ya Myanmar yenye jamii ya Mabuddha walio wengi na wanaishi katika makambi ya wakimbizi nchini Bangladesh.

Watoto 9 wauawa baada ya kugongwa na gari India

Kiasi cha watoto tisa wanafunzi wa shule wameuawa huku wengine 20 wakijeruhiwa baada ya kugongwa na gari nje ya shule yao katika jimbo la Bihar mashariki mwa India leo Jumamosi . Maafisa wa polisi wanasema dereva aliyekuwa akiendesha gari hilo kwa mwendo kasi aliwagonga watoto hao, wakati alipokuwa akiendesha gari kutoka eneo lingine jirani na shule hiyo ambako gari hilo lilikwaruzana na mwenda kwa miguu. Tukio hilo limetokea katika wilaya ya Muzzaffarpur kiasi cha kilomita 70 kutoka jimbo la Patna. Ani Kumar Singh naibu kamishina mkuu wa polisi katika jimbo la Bihar amelieleza shirika la habari la AFP kuwa mashuhuda wamewaeleza dereva wa gari hakusimama mara baada ya kuwagonga watoto hao wa shule. Kiasi cha watoto 12 walio na umri wa miaka kati ya 7 na 14 waliuawa katika jimbo la kaskazini la Uttar Pradesh mwezi Januari wakati basi lao la shuke lilipogongana na lori.

Mahabusu watoroka gerezani Ufilipino

Kiasi ya mahabusu 29 wametoroka gerezani kusini mwa Ufilipino leo Jumamosi wakati mlinzi alipoondoka mara moja katika eneo lake la ulinzi. Hata hivyo, mahabusu 17 miongoni mwao walikamatwa wakati maafisa wa usalama walipofyatua risasi hewani kwa ajili ya tahadhari. Mahabusu 12 waliofanikiwa kutoroka pasipo kukukamatwa katika mahabusu ya polisi iliyoko kwenye mji wa Jolo walikuwa wanakabiliwa na mashitaka ya madawa ya kulevya na wanatafutwa na polisi, wanajeshi na walinzi wa jadi katika miji iliyoko jirani. Maafisa waliwaondoa polisi kadhaa katika maeneo ya ulinzi kufuatia tukio la kutoroka kwa mahabusu hao ambalo bado uchunguzi wake unaendelea. Matukio ya mahabusu kuvunja magereza hutokea kila mwaka nchini Ufilipino kutokana na kukosekana usalama wa uhakika pamoja na hali mbaya magerezani.

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com

Sikiliza sauti 38:58

Albanian Shqip

Amharic አማርኛ

Arabic العربية

Bengali বাংলা

Bosnian B/H/S

Bulgarian Български

Chinese (Simplified) 简

Chinese (Traditional) 繁

Croatian Hrvatski

Dari دری

English English

French Français

German Deutsch

Greek Ελληνικά

Hausa Hausa

Hindi हिन्दी

Indonesian Bahasa Indonesia

Kiswahili Kiswahili

Macedonian Македонски

Pashto پښتو

Persian فارسی

Polish Polski

Portuguese Português para África

Portuguese Português do Brasil

Romanian Română

Russian Русский

Serbian Српски/Srpski

Spanish Español

Turkish Türkçe

Ukrainian Українська

Urdu اردو