default

Taarifa ya Habari za Ulimwengu kutoka Idhaa ya Kiswahili ya DW

Habari | 12.12.2017 | 15:00

Abbas na Hamas kuhudhuria mkutano wa mataifa ya Kiislamu

Rais wa Palestina Mahmoud Abbas na hasimu wake kutoka vuguvugu la Kiislamu la Hamas watahudhuria kwa pamoja mkutano wa kilele wa viongozi wa mataifa ya Kiislamu mjini Jerusalem kesho Jumatano, ulioitishwa na serikali ya Uturuki mjini Istanbul. Ofisi ya Abbas imethibitisha taarifa hizo leo. Kwa upande mwingine Hamas imethibitisha kwamba idadi kadhaa ya viongozi wake, ikiwa ni pamoja na Khaled Meshaal, watahudhuria mkutano huo, wenye lengo la kutafakari uamuzi wa rais Donald Trump wiki iliyopita kutambua mji wa Jerusalem kama mji mkuu wa Israel. Rais wa Uturuki Recep Tayyip Erdogan ameitisha mkutano huo chini ya shirika la ushirikiano wa mataifa ya Kiislamu OIC, chombo ambacho kwa muda mrefu kimeonekana kuwa hakina uwezo na viongozi wake hawana umoja. Idadi kubwa ya mataifa ya Kiarabu hayajathibitisha kushiriki, ikiwa ni pamoja na saudi Arabia na Misri.

Wapalestina wawili wauwawa ukanda wa Gaza

Wapalestina wawili wameuwawa katika Ukanda wa Gaza leo huku maafisa katika eneo hilo linaloongozwa na Hamas wakilaumu mashambulio ya Israel , lakini jeshi la Israel lilikana haraka madai hayo. Mazingira ya tukio hilo, ambalo lilitokea karibu na mpaka wa kaskazini wa Gaza na Israel hayajakuwa wazi. Msemaji wa wizara ya afya ya Palestina Ashraf al-Qudra ameliambia shirika la habari la AFP watu hao wawili waliuwawa katika eneo la Beit Lahia kaskazini mwa Gaza baada ya shambulio la Israel kulenga pikipiki. Vifo hivyo vinakuja huku kukiwa na hali ya wasi wasi kati ya Wapalestina na majeshi ya Israel kufuatia tangazo la rais wa Marekani Donald Trump kuutangaza mji wa Jerusalem kuwa mji mkuu wa Israel na kutaka kuhamisha ubalozi wake mjini humo. Wapalestina wanne kutoka Gaza pamoja na wanamgambo wawili wa Hamas , wameuwawa tangu tangazo hilo kutolewa siku ya Jumatano.

Makubaliano ya kiungwana yawe ya lazima - Brexit

Mratibu mkuu wa masuala ya Brexit katika bunge la Ulaya amesema leo kwamba bunge la Ulaya linataka kusisitiza kuhusu kufikiwa haraka kwa makubaliano kati ya Umoja wa Ulaya na Uingereza katika masharti ya kutengana yawe yanayolazimisha kisheria, likiwa na wasi wasi kwamba Uingereza huenda isitimize makubaliano ya kiungwana yaliyofikiwa. Umoja wa Ulaya na Uingereza ambayo itajitoa kutoka Umoja huo mwezi Machi, mwaka 2019, zimekubaliana Ijumaa iliyopita kuhusu masharti ya kujitoa katika maeneo matatu muhimu, ikiwa ni pamoja na malipo ya fedha, haki za uraia na jinsi gani ya kuepuka matatizo ya mpaka kati ya Ireland ya kaskazini na Ireland. Wakati huo huo mawaziri wa Umoja huo wanamatumaini kwamba kundi hilo la mataifa litakubaliana kuanzisha rasmi awamu ijayo ya mazungumzo ya Brexit katika mkutano utakaofanyika baadaye wiki hii, licha ya kuwa majadiliano kuhusu biashara huenda hayatafanyika hvi karibuni.

Balozi wa Israel asema Jerusalem utabakia mji mkuu wa Israel

Balozi wa Israel nchini Ujerumani Jeremy Issacharoff amesema makubaliano yoyote na Wapalestina yatajumuisha kwamba Jerusalem ni mji mkuu wa Israel. Balozi Issacharoff ameliambia shirika la utangazaji la DW leo kwamba makubaliano yoyote na Wapalestina yatajumuisha mji wa Jetusalem kuwa mji mkuu wa Israel, licha ya kutojibu iwapo alikuwa ana maanisha pia Jerusalem ya mashariki pia. Issacharoff amekiri kwamba Jerusalem ni mji ambao unahisia kali kwa Wayahudi, Wakristo na Waislamu. Issacharoff ameongeza kwamba hatutafika kokote kwa mapambano, na kusema ni juu ya Wapalestina na Waisrael sasa kukaa chini na kufikia makubaliano. Balozi huyo ameweka wazi kwamba kwa maoni yake Umoja wa Mataifa na mashirika mengine na serikali hawapaswi kuingilia mazungumzo hayo. Hata hivyo hakuona matamshi ya Trump kuwa hayana tija.

Macron aungana na viongozi wa dunia

Rais wa Ufaransa Emmanuel Macron amewakusanya viongozi wa dunia leo kuzungumzia kuhusu kugharamia mabadiliko ya tabia nchi, miaka miwili tangu pale mataifa 195 yalipoidhinisha makubaliano ya Paris kuzuwia ongezeko la ujoto duniani. Wachunguzi na washiriki wameonya kwamba bila ya uwekezaji wa matrilioni ya dola katika nishati salama, lengo la makubaliano hayo ya kuweka ongezeko la ujoto kuwa chini ya nyuzi joto mbili za celsius za viwango vya kabla ya mapinduzi ya viwanda, makubaliano hayo yatabakia kuwa ndoto isiyotekelezeka. Mkuu wa masuala ya mabadiliko ya tabia nchi wa Umoja wa mataifa Patricia Espinosa ameonya hatua za kisiasa hazitatosha iwapo hakutakuwa na juhudi za mabadiliko katika mfumo wa kifedha wa dunia na kufanya maendeleo yote yahusishe utoaji wa kiwango cha chini cha hewa chafu, kuweka mkazo zaidi na pia kuwa endelevu.

Stoltenberg apewa miaka mingine miwili kama katibu mkuu wa NATO

Jumuiya ya kujihami ya mataifa ya magharibi NATO leo imemuongezea katibu mkuu wake Jens Stoltenberg muda wa kuhudumia wadhifa huo kwa miaka miwili zaidi hadi 2020, wakati jumuiya hiyo inapitia mageuzi makubwa tangu vita vikuu vya pili vya dunia kupambana na kitisho kinachotokana na Urusi. Wanachama 29 wa jumuiya hiyo wamesema katika taarifa wana imani kubwa na Stoltenberg , ambaye aliandika katika ukurasa wa Twitter kwamba amejisikia amepewa heshima kubwa na anashukuru kurefushwa muda wake madarakani. Stoltenberg, waziri mkuu wa zamani wa Norway, amekuwa katibu mkuu wa NATO tangu Oktoba mosi, 2014. Alichaguliwa kwa kipindi cha kwanza cha miaka minne, ambacho sasa kitarefushwa kwa miaka miwili zaidi.

Wito wa muungano usiothabiti na CDU waonekana kuwa hatari

Pendekezo la kiongozi wa chama cha Social democratic Union SPD nchini Ujerumani Martin Schulz kuunda muungano na chama cha kihafidhina cha kansela Angela Merkel wakati huo huo kukiruhusu chama hicho cha siasa za wastani za mrengo wa kushoto kufanyakazi pamoja na upinzani ni la hatari. Schulz ambaye anasita kuingia katika muungano mwingine chama chake kikiwa mshirika mdogo baada ya matokeo mabaya ya uchaguzi kwa chama hicho cha SPD mwezi Septemba, amependekeza utaratibu ambao utashuhudia chama cha SPD na wahafidhina wakikubaliana kuhusu masuala muhimu, lakini wakiruhusu chama chake kupinga na kufanyakazi pamoja na vyama vya upinzani kuhusu masuala mengine. Chama cha SPD kimepoteza uaminifu kwa kiwango kikubwa na kinapaswa sasa kurejea kufanyakazi kwa dhati, Michael Kretschmer, mwanachama mwandamizi wa chama cha Christian Democratic Union CDU amekiambia kituo cha redio cha Deutschlandfunk.

Watoto 400,000 DRCongo huenda wakafa njaa

Umoja wa Mataifa umeonya leo kwamba zaidi ya watoto 400,000 katika Jamhuri ya kidemokrasi ya Congo wana hali mbaya ya utapia mlo na huenda wakafariki katika miezi michache iwapo hakutakuwa na juhudi za kuingilia kati kwa dharura. Mzozo huo, wa hivi karibuni kabisa kuikumba nchi hiyo iliyokumbwa na matatizo ya Afrika ya kati, unajitokeza katika eneo kubwa la jimbo la Kasai, shirika la kuwahudumia watoto la Umoja wa mataifa UNICEF limesema.Miezi 18 ya mchanganyiko wa ghasia , watu kukimbia makaazi yao na kushuka kwa uzalishaji wa chakula kumesababisha athari kubwa kwa watoto, shirika hilo limesema. Kiasi ya watoto 400,000 chini ya miaka mitano, wana utapia mlo wa kiwango cha juu na wanaweza kufa mwakani iwapo hawatapatiwa haraka msaada wa kiafya na chakula. Hali hii katika jimbo la Kasai inafuatia maelfu ya familia kukimbia makaazi yao baada ya kuishi kwa miezi kadhaa katika hali mabaya, amesema Tajudeen Oyewale , kaimu mwakilishi wa UNICEF nchini Jamhuri ya Kidemokrasi ya Congo.

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com

Albanian Shqip

Amharic አማርኛ

Arabic العربية

Bengali বাংলা

Bosnian B/H/S

Bulgarian Български

Chinese (Simplified) 简

Chinese (Traditional) 繁

Croatian Hrvatski

Dari دری

English English

French Français

German Deutsch

Greek Ελληνικά

Hausa Hausa

Hindi हिन्दी

Indonesian Bahasa Indonesia

Kiswahili Kiswahili

Macedonian Македонски

Pashto پښتو

Persian فارسی

Polish Polski

Portuguese Português para África

Portuguese Português do Brasil

Romanian Română

Russian Русский

Serbian Српски/Srpski

Spanish Español

Turkish Türkçe

Ukrainian Українська

Urdu اردو