Istanbul, Uturuki. Papa amaliza ziara yake Uturuki.

Papa Benedict 16 ameondoka nchini Uturuki mwishoni mwa ziara yake katika taifa la Kiislamu. Hapo mapema , kiongozi huyo wa kanisa Katoliki aliongoza misa mjini Istanbul kwa waumini wa jamii ndogo ya Wakatoliki.

Kabla ya misa hiyo Benedict aliwaachilia njiwa wanne weupe hewani , ikiwa ni ishara ya amani.

Wakati wa hotuba yake, kiongozi huyo wa kanisa Katoliki mwenye umri wa miaka 79 amesema kuwa Vatican haina nia ya kulazimisha chochote kwa yeyote, na kwamba kanisa linatumai tu kuishi katika amani na uhuru.