Merkel kukutana na Hollande

Msemaji wa kansela wa Ujerumani Angela Merkel amesema kuwa mkutano huo utakaofanyika katika mji wa Ludwigsburg kusini magharibi mwa Ujerumani , ambako De Gaulle alitoa hotuba hiyo kwa vijana wa Ujerumani katika hatua muhimu ya maridhiano baada ya vita vikuu vya pili vya dunia, utakuwa tu kwa kiasi kikubwa kwa ajili tu ya heshima za sherehe za maadhimisho.

Lakini mada chache muhimu hata hivyo zitakuwa katika agenda ya majadiliano.

Suala la kampuni la kuunda vyombo vya usafiri wa anga la EADS na lile la Uingereza la BAE bila shaka litazungumzwa katika chakula cha mchana kitakachotumiwa kufanya majadiliano hayo pamoja na rais Francois Hollande, msemaji huyo , Steffen Seibert, amewaambia waandishi habari Ijumaa, (21.09.2012), akilenga kuhusu mkutano huo ambao haukutangazwa sana.

"Bila shaka hakutakuwa na maamuzi Jumamosi hii na msiende katika mkutano huo wa waandishi habari mkitarajia kutakuwa na jambo lolote la maamuzi," alisema Seibert. Hii pia itakuwa pamoja na suala la udhibiti mkali wa sekta ya benki katika bara la Ulaya , mtazamo wa mapambano dhidi ya mzozo wa madeni katika eneo la euro kwa wakati huu, Seibert amesema.

Serikali zimekuwa zikichukua tahadhari tangu kutangazwa wiki iliyopita kuwa kampuni ya vifaa vya ulinzi nchini Uingereza BAE na kampuni linayotengeneza ndege katika bara la Ulaya EADS yanafanya majadiliano ya kuungana.

Rais wa Ufaransa amesema kuwa Paris na Berlin zinasubiri mradi huo wa kuungana kufafanuliwa kabla ya kupitisha maamuzi na kuchukua uamuzi.

Ujerumani pia imechukua msimamo wa kusubiri na kuona, huku baadhi ya maafisa wakitia shaka kuwa muungano huo unaweza kusababisha ukosefu wa ajira.

Makampuni hayo mawili yamepewa hadi Oktoba 10 kukamilisha mradi wao ama waachane nao. Ujerumani na Ufaransa zina hisa nyingi katika kampuni la EADS, wakati serikali ya Uingereza ina hisa kubwa katika kampuni la BAE ambazo zinairuhusu kutumia kura ya turufu kuzuwia maamuzi ambayo inayaona kuwa hayaendani na maslahi ya umma.

Wakati Ufaransa inapendelea kutoa madaraka kwa benki kuu ya Ulaya kuangalia benki zote 6,000 za eneo la mataifa ya euro kuanzia mwezi Januari, Ujerumani inataka kuziangalia benki kubwa tu na haiko katika hali ya kuharakisha, ikipendelea udhibiti wa kina kwanza badala ya haraka.

Sherehe za Jumamosi ni za hivi karibuni kabisa katika wimbi la matukio ya maadhimisho ya miaka 50 ya ushirikiano kati ya mahasimu hao wa wakati wa vita.

Merkel na Hollande watakutana katika kasri la Baroque mjini Ludwigsburg, watatoa maelezo kidogo na kisha watarejea katika shughuli za majadiliano pamoja na kupata chakula cha mchana. Viongozi hao , ambao wanajaribu kuweka msuguano wao katika kiwango cha chini tangu rais Hollande kuingia madarakani mwezi Mei, wanatarajia kuwa na mkutano wa pamoja na waandishi habari mchana.

Mwandishi : Sekione Kitojo / afpe

Mhariri : Iddi Ismail Ssessanga