Wenyeji wa AFCON Ivory Coast wapangwa kundi moja na Nigeria

Wenyeji Ivory Coast imepangwa na Nigeria katika kundi A kwenye mashindano ya kuwania kombe la mataifa ya Afrika mwakani kufutia droo iliyofanyika jana Alhamisi.

Guinea ya Ikweta na Guinea-Bissau, ambazo zimefuzu kwa mara ya nne mfululizo kwa mashindano hayo pia zimepangwa katika kundi hilo.

Mabingwa watetezi Senegal wako katika C pamoja na washindi mara tano wa kombe la mataifa ya Afrika, Cameroon, pamoja na Guinea na Gambia.

Morocco wamepangwa katika kundi F na Jamhuri ya Kidemokrasia ya Congo, Zambia na Tanzania. Ivory Coast inayaandaa mashindano hayo kwa mara ya pili na inatumai kupata matokeo mazuri kuliko 1984.