افغانستان ورلڈ ٹی ٹوئنٹی ’سپر ٹین‘ مرحلے میں

بھارتی شہر ناگپور میں ہفتے کے دن کھیلے گئے گروپ اے کے کوالیفائنگ راؤنڈ کے اس اہم ٹی ٹوئنٹی میچ میں افغانستان نے ٹاس جیت کر پہلے بلے بازی کا فیصلہ کیا۔ افغان بلے بازوں نے شاندار انداز میں مقررہ بیس اوورز میں 186 رنز بنائے۔

نمایاں بلے بازوں میں محمد نبی رہے، جنہوں نے باون رنز کی جارحانہ اننگز کھیلی۔ مین آف دی میچ قرار پانے والے اس افغان آل راؤنڈر نے ایک وکٹ بھی حاصل کی۔ دیگر بلے بازوں میں محمد شہزاد نے چالیس اور سمیع اللہ شنواری نے 43 رنز کی عمدہ انفرادی اننگز کھیلی۔

یہ میچ اس لیے بھی اہم تھا کیونکہ اس میچ کے فاتح نے ورلڈ ٹی ٹوئنٹی کے سپر ٹین مرحلے کے لیے کوالیفائی کرنا تھا۔ انضمام الحق کی کوچنگ میں افغان ٹیم نے نہ صرف بلے بازی بلکہ بولنگ میں بھی انتہائی نپا تلا انداز اپنایا۔ دوسری طرف پاکستان کی قومی ٹیم کے سابق کوچ ڈیو واٹمور اپنی کوچنگ میں زمبابوے کی ٹیم کو کامیابی دلوانے میں ناکام رہے۔

زمبابوے نے جب اننگز شروع کی تو کوئی بھی بلے باز خاص کارکردگی دکھانے میں ناکام رہا اور وقفے وقفے سے وکٹیں گرتی رہیں۔ یوں یہ افریقی ٹیم 127 کے مجموعی اسکور پر ڈھیر ہو گئی۔ افغانستان کی ٹیم اب سپر ٹین میں اپنا پہلا میچ سری لنکا کے خلاف سترہ مارچ کو کولکتہ میں کھیلے گی۔

آج کے اس اہم میچ کے بعد محمد نبی نے میڈیا سے گفتگو کرتے ہوئے کہا کہ وہ بہت خوش ہیں کہ ایک انتہائی اہم میچ میں انہوں نے اچھی کارکردگی کا مظاہرہ کیا، ’’میں اپنی پرفارمنس سے انتہائی خوش ہوں۔ بالخصوص کوالیفائنگ راؤنڈ میں یہ میچ سخت تھا۔‘‘

کوالیفائنگ راؤنڈ کے گروپ بی میں شامل بنگلہ دیش اور عمان کی ٹیمیں اتوار کے دن آمنے سامنے آئیں گی۔ اس میچ کی فاتح ٹیم بھی سپر ٹین تک رسائی حاصل کر لے گی۔ اس اہم میچ کی فاتح ٹیم سولہ مارچ کو کولکتہ میں پاکستان کے خلاف میدان میں اترے گی۔