برطانوی ایٹمی آبدوز پر فائرنگ، ایک اہلکار ہلاک

لندن میں برطانوی وزارت دفاع اور پولیس حکام نے بتایا کہ اس فائرنگ کا ذمہ دار آبدوز کے عملے کا ایک ایسا رکن ہے جسے قتل کے شبے میں گرفتار کر لیا گیا ہے۔ لندن سے موصولہ رپورٹوں کے مطابق یہ واقعہ Astute نامی برطانوی ایٹمی آبدوز پر اس وقت پیش آیا جب وہ ساوتھیمپٹن کی بندرگاہ پر کھڑی تھی۔ زخمی ہونے والے بحریہ کے اہلکار کو ہسپتال پہنچا دیا گیا ہے جہاں اس کی حالت خطرے سے باہر بیان کی جاتی ہے۔

برطانوی وزارت دفاع کے مطابق یہ واقعہ جمعہ کے روز بعد دوپہر پیش آیا اور اس کا تعلق کسی قسم کی ممکنہ دہشت گردی سے نہیں تھا۔ یہ بھی کہا گیا ہے کہ اس نیوکلیئر آبدوز پر پیش آنے والے اس واقعے کی وجہ سے برطانوی پبلک کو کسی بھی وقت کوئی خطرہ لاحق نہیں تھا۔

اس آبدوز کا وزن ساڑھے ساٹھ ہزار ٹن ہے اور یہ برطانیہ میں ایٹمی ایندھن سے چلنے والی آبدوزوں کی جدید ترین قسموں میں شمار ہوتی ہے۔

جمعہ کے روز Astute پر پیش آنے والا یہ واقعہ کسی برطانوی آبدوز پر پیش آنے والا اپنی نوعیت کا سب سے خونریز واقع قرار دیا جا رہا ہے۔ یہ ایٹمی آبدوز گزشتہ سال اگست سے برٹش نیوی کے استعمال میں ہے تاہم اس پر کو ئی ایٹمی ہتھیار موجود نہیں ہے۔

برطانوی اخبار ڈیلی ٹیلی گراف کے مطابق فائرنگ کا یہ واقعہ اس وقت پیش آیا جب اس آبدوز پر گارڈ کی ڈیوٹیاں تبدیل کی جا رہی تھیں۔ اس آبدوز کی تیاری پر ایک بلین پاؤنڈ خرچ ہوئے تھے اور اس کے عملے کی تعداد اٹھانوے ہے۔ یہ رپورٹیں بھی ملی ہیں کہ جس وقت یہ فائرنگ ہوئی تھی اس وقت اس آبدوز پر کئی اہم سول شخصیات بھی موجود تھیں تاہم اس فائرنگ کے نتیجے میں ان کو کوئی نقصان نہیں پہنچا۔

رپورٹ: عصمت جبیں

ادارت : شادی خان سیف