بنڈس لیگا: بائرن میونخ نے برلن کو شکست دے دی

اس میچ میں فتح کے بعد میونخ کی ٹیم پوائنٹس ٹیبل پر دوسرے نمبر کی ٹیم سے پانچ پوائنٹس کا فرق قائم میں کامیاب ہو گئی ہے جبکہ دفاعی چیمپئن ڈورٹمنڈ سے اس کے پوائنٹس کا فرق اب چھ ہو چکا ہے۔ گزشتہ سیزن میں میونخ کی ٹیم تیسرے نمبر پر رہی تھی اور سیزن کے اختتام پر ڈورٹمنڈ کے مقابلے میں اسے دس پوائنٹس کے خسارے کا سامنا کرنا پڑا تھا۔

برلن کے خلاف ہفتے کے روز کھیلے گئے میچ میں بائرن میونخ کی جانب سے ماریو گومیس، فرانک ریبری اور باستیان شوائن شٹائگر نے گول کیے۔ میچ کے 69 ویں منٹ میں گومیس نے اپنا دوسرا گول کیا۔

میچ کے بعد بائرن میونخ کے کوچ Heynckes نے اپنے ایک انٹرویو میں کہا کہ ان کی ٹیم نے خصوصاﹰ پہلے ہاف میں غیر معمولی کھیل کا مظاہرہ کیا۔ ’’ہم نے بال کو اپنا کام کرنے دیا۔ ہماری پاسنگ زبردست تھی اور ہم نے جلد ہی تین گول کر لیے۔ دوسرے ہاف میں ہم نے میچ پر اپنی گرفت کا مظاہرہ جاری رکھا اور بال کو زیادہ تر اپنے پاس ہی رکھا اور گول کے متعدد موقع بنائے۔‘‘

میچ کا نتیجہ بائرن میونخ کے سابق سٹار کھلاڑی اور برلن کے کوچ کی حیثیت سے خدمات انجام دینے والے مارکوس بابیل کے لیے سخت مایوس کن رہا ہے۔ میچ کے بعد بابیل کا کہنا تھا کہ ان کی ٹیم بائرن میونخ کے خلاف ویسا کھیل پیش کرنے میں ناکام رہی، جیسا وہ عمومی طور پر کرتی ہے۔

ہفتے کے روز کھیلے گیے دیگر میچوں میں مؤنشن گلاڈ باخ اور لیورکوزن کے درمیان کھیلا گیا میچ دو دو گول سے برابر رہا۔ ایک اور میچ میں آؤگسبرگ نے مائنز کو صفر کے مقابلے میں ایک گول سے شکست دے دی جبکہ شٹٹ گارٹ نے ہوفن ہائم کو دو صفر سے ہرا دیا۔

اس میچ ڈے کے سلسلے میں اتوار کے روز دو مقابلے ہوں گے۔ فرائی برگ کی ٹیم ہیمبرگ کے مد مقابل ہو گی جبکہ کولون کا مقابلہ ہینوور سے ہو گا۔

رپورٹ: عاطف توقیر

ادارت: مقبول ملک