’بھارتی فوج کی فائرنگ سے‘ تین پاکستانی فوجی ہلاک

جمعرات کو صحافیوں سے گفتگو کرتے ہوئے پاکستانی فوج کے ترجمان میجر جنرل اطہر عباس نے کہا کہ وادیء نیلم میں فائرنگ کا یہ واقعہ اس وقت پیش آیا، جب پاکستانی فوجی ایک چوکی سے دوسری چوکی کی طرف جا رہے تھے۔ انہوں نے کہا کہ بھارتی فوج نے ’بلااشتعال‘ فائرنگ کی۔

اطہر عباس نے تین پاکستانی فوجیوں کی ہلاکت کی تصدیق کرتے ہوئے فائرنگ کے اس واقعہ کی شدید مذمت کی ہے۔ انہوں نے بتایا کہ بھارتی فوج کی طرف سے اچانک فائرنگ کے بعد جوابی فائرنگ بھی کی گئی۔ اطہر عباس نے مزید کہا کہ اس معاملے کو بھارت کے مقامی فوجی کمانڈوں کی سطح پر اٹھایا گیا ہے۔

دوسری طرف بھارتی فوج نے دعویٰ کیا ہے کہ فائرنگ پاکستانی فوج کی طرف سے شروع ہوئی۔ بھارتی فوج کے ترجمان جے ایس برار نے خبر رساں ادارے روئٹرز کو بتایا، ’پاکستانی فوجیوں نے فائرنگ کا آغاز کیا، ہم نے صرف اس کا جواب دیا۔ بدھ کی صبح پاکستانی فوج نے مارٹر گولے برسائے، جب ہمارے دستوں نے اس کا جواب دیا تو فائرنگ کا سلسلہ شروع ہو گیا‘۔

اگرچہ جنوبی ایشیا کے ان دونوں ہمسایہ ممالک نے اس علاقے میں فائر بندی کا ایک معاہدہ کر رکھا ہے تاہم اس کے باوجود دونوں ہی ایک دوسرے پر اس معاہدے کی خلاف ورزی کے الزامات عائد کرتے رہتے ہیں۔

رپورٹ: عاطف بلوچ

ادارت: مقبول ملک