بھارتی یوم جمہوریہ، ابوظہبی کے ولی عہد مہمان خصوصی

تجزیہ کاروں کے مطابق بھارت خلیجی ممالک کے ساتھ اپنے روابط تیزی سے مضبوط بنانے کی کوشش میں ہے۔ اسی وجہ سے آج بھارت کے یوم جمہوریہ جیسے اہم موقع پر ابوظہبی کے ولی عہد اور متحدہ عرب امارات کی مسلح افواج کے ڈپٹی سپریم کمانڈر محمد بن زيد النہیان کو مہمان خصوصی کے طور پر مدعو کیا گیا تھا۔

دوسری جانب متحدہ عرب امارات کی طرف سے نئی دہلی حکومت کے ساتھ دوستی کے اظہار کے لیے ہندوستانی فوجیوں کی پریڈ میں یو اے ای کا ایک خصوصی فوجی دستہ بھی شریک ہوا۔ اس موقع پر متحدہ عرب امارات کی سب سے بلند عمارت برج خلیفہ پر روشنیوں کی مدد سے بھارتی پرچم بھی بنایا گیا۔ یو اے ای حکومت کے مطابق برج خلیفہ پر روشنیوں کی مدد سے اس طرح بھارتی پرچم  کل بھی بنایا گیا تھا اور آج چھبیس جنوری کو پھر ایسا کیا جائے گا۔ جریدے گلف نیوز نے اس موقع پر ’مرحبا ہندوستان‘ جیسے الفاظ استعمال کیے ہیں جبکہ متحدہ عرب امارات میں بھی خصوصی تقریبات کا انعقاد کیا جا رہا ہے۔

آج بھارتی دارالحکومت میں ہونے والی تقریب کے موقع پر سکیورٹی کو یقینی بنانے اور ممکنہ دہشت گردی کی روک تھام کے لیے صرف نئی دہلی میں ہی پچاس ہزار سے زائد پولیس اہلکار تعینات کیے گئے تھے۔ بھارتی خفیہ ایجنسیوں نے خبردار کر رکھا تھا کہ عسکریت پسند ہائی جیکنگ کرتے ہوئے، ڈرون کے ذریعے یا پھر پولیس کی وردیاں استعمال کرتے ہوئے اس تقریب کا نشانہ بنا سکتے تھے۔

بھارت کی شمال مشرقی ریاستوں میں آج کے دن گیارہ دھماکے ہوئے تاہم یہ بڑی نوعیت کے نہیں تھے۔ پولیس کے مطابق ان میں سے سات دھماکے آسام ریاست میں ہوئے۔ نئی دہلی کے علاوہ جموں و کشمیر اور ممبئی میں بھی سکیورٹی ہائی الرٹ رکھی گئی۔

بھارت کے یوم جمہوریہ کو بھارت کے زیر انتظام کشمیر کے علاوہ پاکستان کے زیر انتظام کشمیر میں بھی یوم سیاہ کے طور پر منایا جاتا ہے۔

بھارت میں یہ دن 1950ء میں اسی دن نافذ ہونے والے ملکی آئین کے حوالے سے یوم جمہوریہ کے طور پر منایا جاتا ہے۔ آج فوجی پریڈ کے ساتھ ساتھ اس موقع پر رنگا رنگ پروگراموں کا انعقاد بھی کیا گیا۔ بھارت کی طرف سے آج بھرپور فوجی طاقت کا بھی مظاہرہ کیا گیا۔ جنگی جہازوں کی پروازوں کے ساتھ ساتھ جنگی ٹینکوں اور میزائلوں کی نمائش بھی کی گئی۔