بیلجیم میں چار مشتبہ افراد پر فرد جرم عائد

خبر رساں ادارے اے ایف پی نے برسلز سے آمدہ رپورٹوں کے حوالے سے بتایا ہے کہ عبرینی پر الزام عائد کیا گیا ہے کہ وہ ’دہشت گرد گروہ کی کارروائیوں اور لوگوں کی ہلاکت میں ملوث‘ تھا۔

نو اپریل بروز ہفتہ بیلجیم کے استغاثہ نے اس پر فرد جرم عائد کرنے کی تصدیق کی ہے۔ تاہم یہ واضح نہیں کہ اکتیس سالہ عبرینی آيا بائیس مارچ کو برسلز ميں ہونے والے حملوں میں بھی شریک تھا۔ اسے جمعے کے روز برسلز کے مؤلن بيک نامی علاقے سے حراست ميں ليا گيا۔

بائیس مارچ کو برسلز ایئر پورٹ اور ایک میٹرو اسٹیشن پر حملوں کے نتیجے میں بتیس افراد مارے گئے تھے۔ بعد ازاں جائے وقوعہ سے حاصل کردہ سی سی ٹی وی فوٹیج میں ایک ایسا شخص نظر آیا تھا، جو عبرینی سے مشابہت رکھتا ہے لیکن یہ واضح نہیں کہ یہ وہی ہے۔ حکام نے بتایا ہے کہ اس حوالے سے ابھی تفتیشی عمل جاری ہے۔

عبرینی کے علاوہ اسامہ ۔کے نامی ایک مشتبہ شخص پر بھی فرد جرم عائد کی گئی ہے۔ مقامی میڈیا نے حکام کے حوالے سے بتایا ہے کہ اسامہ برسلز حملوں کے وقت اس میٹرو اسٹیشن پر موجود تھا، جسے حملوں کا نشانہ بنایا گیا تھا۔

دیگر دو ملزمان، جن پر فرد جرم عائد کی گئی ہے، ان میں روانڈا کا شہری Herve B.M اور ستائیس سالہ بلال ۔ای۔ایم شامل ہے۔ ان افراد کو برسلز بم حملوں میں ملوث ہونے کے الزامات کے تحت گرفتار کیا گیا تھا۔

حکام نے بتایا ہے کہ عبرینی کے ہمراہ جن دو افراد کو گزشتہ روز گرفتار کیا گیا تھا، انہیں پوچھ گچھ کے بعد رہا کر دیا گیا ہے۔ ہفتے کے دن ہی بیلجیم کی سکیورٹی فورسز نے برسلز میں واقع ایک اپارٹمنٹ پر چھاپہ بھی مارا، تاہم اس کارروائی میں کسی کو گرفتار نہیں کیا گیا۔ حکام کو شبہ تھا کہ یہ اپارٹمنٹ حملوں آوروں کو محفوظ رہائش فراہم کرنے کے لیے استعمال کیا جا رہا تھا، لیکن اس تناظر میں کوئی شواہد نہ ملے۔

فرانس اور بیلجیم میں ہونے والے حالیہ حملے اس براعظم میں گزشتہ سالوں میں اسلامک اسٹیٹ کے جنگجوؤں کے دو بڑے حملے قرار دیے جاتے ہیں۔

سکیورٹی تجزیہ نگاروں کا کہنا ہے کہ ان حملوں کی تحقیقات کے سلسلے میں ہونے والی گرفتاریاں انتہائی اہم ہیں کیونکہ ملزمان سے تفتیش سے معلوم ہو سکے گا کہ ان حملوں میں اسلامک اسٹیٹ کا کیا کردار تھا اور ان جہادیوں کے یورپ میں کہاں کہاں اور کس کس سے رابطے ہیں۔