بے نظیر بھٹّو کی پچپنویں سالگرہ

پاکستان پیپلز پارٹی کی سابق چیئر پرسن اور سابق وزیرِ اعظم پاکستان بے نظیر بھٹّو کی پچپنویں سالگرہ آج پاکستان بھر میں منائی گئی۔ یہ بے نظیر بھٹّو کے قتل کے بعد ان کی پہلی سالگرہ ہے۔ اس مناسبت سے تقریبات کا انعقاد پیپلز پارٹی کے ضلعی ہیڈ کوارٹرز میں ہوا۔ مرکزی تقریب بے نظیر بھٹّو کے آبائی گائوں گڑھی خدا بخش میں ہوئی جہاں پیپلز پارٹی کے شریک چئیر مین آصف زرداری نے بے نظیر بھٹّو کی قبر پر پھول چڑھائے۔

بے نظیر بھٹّو کے انتقال کے بعد پیپلز پارٹی کی سیاست میں کیا تبدیلیاں رونما ہو رہی ہیں؟ بے نظیر بھٹّو کی سیاسی وراثت اور پیپلز پارٹی کے ارتقائی سفر کی مناسبت سے جب ہم نے بات کی سویڈن میں مقیم پاکستان لیبر پارٹی کے نمائندے فاروق سلہریا سے تو انہوں نے کہا کہ بے نظیر بھٹّو کی قیادت میں پیپلز پارٹی اپنا عوامی رنگ کھو چکی تھی۔