ریاست آلاباما کے انتخابات، ٹرمپ کے لیے سیاسی زلزلہ

ایک جانب تو امریکی کانگریس کے ایوان بالا کی اس خالی نشست پر ہونے والے ضمنی انتخاب میں ڈیموکریٹ امیدوار ڈگ جونز کی کامیابی انتہائی غیر متوقع ہے جبکہ دوسری طرف اس نتیجے کو امریکی صدر ڈونلڈ ٹرمپ کے لیے ایک دھچکا بھی قرار دیا جا رہا ہے۔ اس لیے کہ ٹرمپ کے منتخب کردہ امیدوار روئے مور  مبینہ جنسی  بداخلاقی کے الزامات کی وجہ سے اپنی انتخابی مہم چلانے میں ناکام رہے تھے۔ ٹرمپ نے ان الزامات کے باوجود روئے کو اپنے مکمل تعاون کی یقین دہانی کرائی تھی۔

ملکی ذرائع ابلاغ کے مطابق اس الیکشن میں تریسٹھ سالہ ڈگ جونز نے اتنی زیادہ برتری حاصل کر لی ہے کہ اب انہیں شکست نہیں دی جا سکتی۔ بتایا گیا ہے کہ آلاباما کے تمام انتخابی حلقوں کے نتائج کے مطابق جونز کو49.9 فیصد جبکہ مور کو 48.4  فیصد ووٹ ملے ہیں۔ یہ اکیس ہزار ووٹوں کا فرق بنتا ہے۔ ان انتخابات میں 1.3 ملین ووٹروں نے اپنا حق رائے دہی استعمال کیا۔

اس نتیجے کے بعد ڈیموکریٹک پارٹی میں خوشی کی لہر دوڑ گئی۔ سابق وزیر خارجہ ہلیری کلنٹن نے اپنی ایک ٹویٹ میں کہا، ’’ آج آلاباما نے ایک ایسے سینیٹر کا انتخاب کیا ہے جو ان کے لیے فخر کا باعث ہو گا۔ اگر ڈیموکریٹ آلاباما میں کامیاب ہو سکتے ہیں تو اس کا مطلب یہ ہے کہ ہم ہر جگہ مقابلہ کریں گے اور مقابلہ کرنے کے اہل ہیں۔‘‘

سابقہ جنسی زندگی، ٹرمپ کے لیے نئی پریشانی

کردارکشی کی یہ ایک بین الاقوامی مہم ہے، ڈونلڈ ٹرمپ

نیو یارک سب وے سسٹم میں جنسی جرائم میں ساٹھ فیصد اضافہ

اس ضمنی الیکشن میں ڈیموکریٹ امیدوار کی کامیابی کے بعد امریکی سینیٹ میں صدر ٹرمپ کی ریپبلکن پارٹی کو حاصل اکثریت اب اکاون سے کم ہو کر انچاس رہ گئی ہے۔ آلاباما امریکا کی انتہائی قدامت پسند ریاستوں میں سے ایک ہے اور جونز گزشتہ پچیس برسوں میں اس ریاست سے سینیٹ میں پہنچنے والے ڈیموکریٹک پارٹی کے پہلے امیدوار ہیں۔