سینٹ پاؤلی بنڈس لیگا سے اخراج کے خطرے سے دوچار

جمعے کے روز کھیلے گئے اس میچ میں کائزرزلاؤٹرن نے سینٹ پاؤلی کو صفر کے مقابلے میں دو گول سے شکست دی۔ کائزرزلاؤٹرن کی طرف سے کرسٹیان ٹیفرٹ اور ماتھیاس آبیل نے گول کر کے اپنی ٹیم کو فتح کی راہ ہموار کی۔

اس جیت کے بعد کائزرزلاؤٹرن کی ٹیم لیگ میں گیارہویں پوزیشن پر آ گئی ہے اور اس کے بنڈس لیگا سے خارج ہونے کا خطرہ کافی حد تک کم ہو گیا ہے تاہم سینٹ پاؤلی کی ٹیم اب لیگ سے خارج ہو جانے کے خطرے سے دوچار ہو گئی ہے۔ بنڈس لیگا کے ہر سیزن میں 18 ٹیمیں حصہ لیتی ہیں جبکہ سیزن میں 17ویں اور 18 ویں نمبر پر آنے والی ٹیمیں بنڈس لیگا ون سے خارج کر دی جاتی ہیں اور انہیں بنڈس لیگا ٹو کھیلنا پڑتا ہے جبکہ 16ویں نمبر کی ٹیم کو Relegation Play-off سے دوچار ہونا پڑتا ہے۔

جمعہ کے روز کھیلے گئے ایک اور میچ میں وولفس برگ نے بریمن کو شکست سے دوچار ہے۔ اس شکست کے بعد بریمن کی ٹیم لیگ میں 12 نمبر پر آ گئی ہے۔

آج ہفتے کے روز لیگ کی اب تک کی ٹاپ ٹیم ڈورٹمنڈ کا مقابلہ نیورمبرگ سے ہو گا جبکہ پوائنٹس ٹیبل پر دوسرے نمبر پر براجمان لیورکوزن کی ٹیم کولون کے مدمقابل آئے گی۔

مائنز کا میچ فرینکفرٹ سے جبکہ ہیمبرگ کا مقابلہ فرائی برگ سے ہو گا۔ ہینوور اور مؤنشن گلاڈباخ کی ٹیمیں آمنے سامنے آئیں گی جبکہ ہوفن ہائم کا مقابلہ اشٹٹ گارٹ اور دفاعی چیمپیئن بائرن میونخ کا سامنا شالکے سے ہو گا۔ اس وقت پوائنٹس ٹیبل پر ڈورٹمنڈ 69 پوائنٹس کے ساتھ سرفہرست ہے اور لیورکوزن 64 پوائنٹس کے ساتھ دوسرے نمبر پر ہے۔

رپورٹ : عاطف توقیر

ادارت : عاطف بلوچ