اہم عالمی خبریں | 18.10.2017 | 11:59

جوہری ڈیل کو بچانے کے لیے یورپ زیادہ فعال کردار ادا کرے، ایرانی سپریم لیڈر

ایران کے سپریم لیڈرعلی خامنہ ای نے کہا ہے کہ تہران کی عالمی طاقتوں کے ساتھ جوہری ڈیل کو بچانے کی خاطر یورپ کو زیادہ فعال کردار ادا کرنا چاہیے۔ بدھ کے روز خامنہ ای کی طرف سے جاری کردہ ایک بیان کے مطابق اس تناظر میں یورپ کی طرف سے امریکی صدر ڈونلڈ ٹرمپ پر کی جانے والی تنقید خوش آئند ہے اور اگر یورپ اس ڈیل پر کاربند رہتا ہے، تو ایران بھی اپنی ذمہ داریاں پوری کرتا رہے گا۔ تاہم انہوں نے کہا کہ یورپی ممالک کو امریکا پر دباؤ بڑھانا چاہیے کہ وہ اس جوہری معاہدے سے دستبردار نہ ہو۔

میڈرڈ کا کاتالونیا کو ایک اور انتباہ

ہسپانوی حکومت نے کاتالونیا کی علاقائی حکومت کو دوبارہ خبردار کیا ہے کہ اگر اس نے آزادی سے متعلق اپنا موقف تبدیل نہ کیا تو اس علاقے کی نیم خود مختار حیثیت کو ختم کرنے کے لیے غیرمعمولی اقدامات کیے جائیں گے۔ اس تںاظر میں اسپین کی مرکزی حکومت نے کاتالونیا کو جمعرات کی صبح دس بجے تک کی مہلت دی ہے کہ وہ اپنا موقف واضح کرے کہ یہ خطہ اسپین سے علیحدگی کا ارادہ ترک کر چکا ہے۔ یکم اکتوبر کے ریفرنڈم میں اس علاقے نے اسپین سے علیحدگی کے حق میں ووٹ دیا تھا، جس کے نتیجے میں کاتالونیا اور میڈرڈ کے مابین تناؤ پایا جاتا ہے۔

اب دیرالزور میں کارروائی تیز ہو گی، ایس ڈی ایف

امریکی حمایت یافتہ شامی جنگجو گروہ سیریئن ڈیموکریٹک فورسز (ایس ڈی ایف) نے کہا ہے کہ الرقہ میں داعش کی شکست کے بعد اب مشرقی شامی علاقوں میں ان جہادیوں کے خلاف کارروائی زیادہ تیز کر دی جائے گی۔ بتایا گیا ہے کہ اب یہ جنگجو گروہ اپنے دستوں کو مشرقی صوبے دیرالزور میں تعینات کر دے گا، جہاں دریائے فرات کے مشرقی حصے میں یہ گروہ پہلے سے ہی داعش کے خلاف کارروائی جاری رکھے ہوئے ہے۔ دیرالزور میں اس تاریخی دریا کے مغربی کنارے پر روسی حمایت یافتہ شامی فورسز بھی داعش کو نشانہ بنا رہی ہیں۔

پرتگالی وزیر داخلہ نے استعفیٰ دے دیا

پرتگال کی وزیر داخلہ کونسٹانسا اُربانو ڈی سوزا نے استعفیٰ دے دیا ہے۔ ملک میں جنگلاتی آگ پر قابو پانے کے حوالے سے حکومتی ردعمل پر انہوں نے اپنے عہدے سے الگ ہونے کا فیصلہ کیا۔ اتوار کے روز وسطی اور شمالی پرتگال کے علاقوں میں اس آگ کے نتیجے میں اکتالیس افراد ہلاک جبکہ اکہتر زخمی ہو گئے تھے۔ اس یورپی ملک میں گزشتہ چار ماہ کے دوران ایسے حادثات میں سو افراد لقمہ اجل بن چکے ہیں۔ اس وجہ سے پرتگالی اپوزیشن نے ڈی سوزا کے استعفے کا مطالبہ کر رکھا تھا۔

تائیوان میں آزادی کی تحریک کچل دی جائے گی، شی جن پنگ کا انتباہ

چینی صدر شی جن پنگ نے خبردار کیا ہے کہ تائیوان کی چین سے الگ ہونے کی کوششوں کو ناکام بنا دیا جائے گا۔ حکمران کمیونسٹ پارٹی کی کانگریس سے اپنے افتتاحی خطاب میں بدھ کے دن انہوں نے کہا کہ اس تناظر میں بیجنگ حکومت کی قابلیت پر کوئی شک نہیں کیا جانا چاہیے۔ چینی صدر کے اس بیان پر ردعمل ظاہر کرتے ہوئے تائیوان کی حکومت نے کہا ہے کہ ملک کے مستقبل کا فیصلہ کرنا ریاست کے تئیس ملین شہریوں کا حق ہے۔ تائیوانی حکومتی بیان میں چینی صدر کے اس بیان کو ’افسوسناک‘ قرار دیتے ہوئے کہا گیا کہ چین اپنی ون چائنہ پالیسی سے اپنے لوگوں کا اعتماد نہیں جیت سکتا۔

قطری امیر ہمسایہ ممالک سے مذکرات پر آمادہ

قطر کے امیر شیخ تمیم بن حمد الثانی نے ہمسایہ ریاستوں پر زور دیا ہے کہ وہ گزشتہ چار ماہ سے جاری قطر کا ’ناجائز‘ اقتصادی بائیکاٹ ختم کر دیں۔ انہوں نے بدھ کے دن کہا کہ وہ اس تنازعے کے خاتمے کے لیے مذاکرات پر آمادہ ہیں۔ انڈونیشیا کے دورے کے دوران قطری امیر نے صدر جوکو وِدودو کے ساتھ مشترکہ پریس کانفرنس میں مزید کہا کہ اس بحران کے باعث تمام خلیجی ممالک کو نقصان ہو رہا ہے۔

صومالی دستوں نے مظاہرین پر فائرنگ کر دی

صومالی پولیس نے گزشتہ ہفتے موغادیشو میں ہوئے خونریز بم حملے کے خلاف ہونے والے ایک مظاہرے کو منعقد ہونے سے روکنے کی کوشش کی ہے۔ مقامی میڈیا کے مطابق مظاہرین کو منشتر کرنے کی خاطر صومالی دستوں نے فائرنگ بھی کی۔ روئٹرز نے عینی شاہدین کے حوالے سے بتایا کہ پولیس نے اس مقام کی ناکہ بندی کر دی تھی تاکہ لوگ وہاں نہ پہنچ سکیں۔ اس مقام پر ہوئے خونریز حملے میں تین سو افراد ہلاک ہو گئے تھے، جس پر ملکی عوام شدید غم و غصے میں ہیں۔

پاکستان نے پچیس بھارتی ماہی گیر گرفتار کر لیے

پاکستانی حکام نے سمندری حدود کی خلاف ورزی کے الزام میں پچیس بھارتی ماہی گیروں کو حراست میں لے لیا ہے۔ بدھ کے دن حکام نے بتایا کہ سمندری حدود کی نگرانی کرنے والے دستوں نے گزشتہ چار دنوں کے دوران ان بھارتی شہریوں کو قید میں لیا جبکہ چار کشتیوں کو بھی ضبط کر لیا گیا۔ پولیس کے مطابق ان ماہی گیروں کو جمعرات کے دن عدالت کے سامنے پیش کیا جا رہا ہے۔

عراقی فوج نے موصل شہر کا کنٹرول سنبھال لیا

عراقی فورسز نے عسکری کارروائی کرتے ہوئے موصل شہر کا انتظام سنبھال لیا ہے۔ نینوا صوبے کے اس شہر کا انتظام گزشتہ تین برسوں سے کرد فورسز کے پاس تھا۔ بدھ کے دن عراقی فوج کی طرف سے بتایا گیا کہ کردوں کی پیش مرگہ فورسز اس علاقے سے نکل گئی ہیں۔ داعش کے خلاف جاری لڑائی کے دوران پیش مرگہ نے موصل کا کنٹرول حاصل کیا تھا۔ اب اس شہر میں جہادیوں کو شکست دی جا چکی ہے۔

کوئٹہ میں خود کش حملہ، سات افراد مارے گئے

پاکستان میں طالبان کے ایک خود کش حملے کے نتیجے میں پانچ پولیس اہلکار اور دو شہری مارے گئے ہیں۔ پاکستان کے شورش زدہ صوبہ بلوچستان کے دارالحکومت کوئٹہ میں بدھ کے دن ہوئے اس حملے میں بائیس افراد زخمی بھی ہوئے ہیں، جن میں سکیورٹی فورسز کے ارکان کے علاوہ کئی شہری بھی شامل ہیں۔ طبی ذرائع کے مطابق آٹھ زخمیوں کی حالت تشویشناک ہے۔ پاکستانی میڈیا کے مطابق اس کارروائی کی ذمہ داری طالبان باغیوں نے قبول کر لی ہے۔

ایرانی فوجی سربارہ کا دورہ دمشق، عسکری تعاون پر اتفاق

ایران کے فوجی سربراہ نے شامی فوج کے ساتھ عسکری تعاون میں مزید قربت پیدا کرنے کی خاطر شامی حکام سے ملاقات کی ہے۔ شامی میڈیا نے بدھ کے دن بتایا کہ اپنے دورہ دمشق کے دوران جنرل محمد باقری نے اسرائیل کے اور شام میں فعال سنی انتہا پسند گروہوں کے خلاف اپنی کارروائی جاری رکھنے کا عزم ظاہر کیا۔ دمشق میں انہوں نے کہا کہ ایران اور شام اس تناظر میں اپنی رابطہ کاری کو مزید بہتر بنائیں گے۔

سیول میں شمالی کوریا سے متعلق سہ فریقی مذاکرات

شمالی کوریا کے متنازعہ جوہری پروگرام کے بارے میں جاپان، جنوبی کوریا اور امریکا کے سفارتکار بدھ کے دن سیول میں ملاقات کر رہے ہیں۔ اس دوران اس بحران سے نمٹنے کی خاطر پالیسی ردعمل زیر بحث آئے گا۔ امریکا اور اس کے اتحادی ملک جاپان نے کہا ہے کہ وہ پیونگ یانگ پر دباؤ بڑھانے کی خاطر مزید راستے تلاش کرنے کی کوشش کریں گے۔ یہ مذاکرات ایسے وقت پر ہو رہے ہیں، جب امریکا اور جنوبی کوریا مشترکہ فوجی مشقیں بھی کر رہے ہیں۔

کینیا میں الیکشن کمشنر مستعفی

کینیا کی خاتون الیکشن کمشنر روزلین آکومبے نے اپنے دیگر سات ساتھی الیکشن کمشنرز پر الزام عائد کیا ہے کہ وہ سیاسی طور پرجانبدار ہیں اور آئندہ صدارتی انتخابات شفاف نہیں ہوں گے۔ اس بیان کے ساتھ ہی انہوں نے اپنے عہدے سے استعفیٰ بھی دے دیا۔ آکومبے نے کہا کہ وہ اس عہدے پر براجمان رہتے ہوئے ضمانت نہیں دے سکتیں کہ چھبیس اکتوبر کے الیکشن شفاف اور غیر جانبدار ہوں گے اور اسی لیے وہ اس عمل کا حصہ نہیں رہنا چاہتیں۔

شی جن پنگ کا ملکی ٹیکنالوجی کے شعبے میں اصلاحات پر زور

چینی صدر شی جن پنگ نے حکمران کمیونسٹ پارٹی پر زور دیا ہے کہ وہ ملکی ٹیکنالوجی کی صنعت کی ترقی میں قائدانہ کردار ادا کرے۔ کمیونسٹ پارٹی کی کانگریس سے افتتاحی خطاب میں بدھ کے دن انہوں نے مزید کہا کہ اس مقصد کی خاطر مختلف ریاستی اداروں کے مابین زیادہ بہتر رابطہ کاری ہونی چاہیے۔ چینی کمیونسٹ پارٹی کا یہ اجلاس ہر پانچ برس بعد منعقد کیا جاتا ہے، جس میں آئندہ ملکی سربراہ کے چناؤ کے علاوہ قومی حکمت عملی بھی ترتیب دی جاتی ہے۔ سن دو ہزار بارہ میں پارٹی سربراہ بننے والے شی جن پنگ متوقع طور پر دوبارہ اس عہدے کے لیے منتخب کر لیے جائیں گے۔

ملک کے مستقبل کا فیصلہ شہریوں کو کرنا ہے، تائیوانی حکومت

تائیوان کی حکومت نے بدھ کے روز کہا کہ ملک کے مستقبل کا فیصلہ کرنا ریاست کے تئیس ملین شہریوں کا حق ہے۔ یہ بیان ایک ایسے وقت پر دیا گیا ہے، جب چینی صدر شی جن پنگ نے کہا ہے کہ اس جزیرے کو چین سے الگ کرنے کی کسی بھی کوشش کو ناکام بنا دیا جائے گا۔ بیجنگ حکومت ون چائنہ پالیسی کے تحت تائیوان کو اپنا حصہ قرار دیتی ہے۔ شی جن پنگ نے واضح کیا کہ اس علاقے کو چین سے الگ نہیں ہونے دیا جائے گا۔ تاہم تائیوان میں چین مخالف جذبات پائے جاتے ہیں۔

الرقہ میں داعش کی شکست، لیکن خطرات ٹلے نہیں

سکیورٹی مبصرین نے خبردار کیا ہے کہ شامی شہر الرقہ کی بازیابی سے خطرات ٹلے نہیں ہیں۔ داعش کے جنگجوؤں کا سابقہ نام نہاد دارالحکومت قرار دیے جانے والے اس شہر میں جہادیوں کو پسپا کر دیا گیا ہے تاہم ایسے خطرات ہیں کہ وہاں باغیانہ کارروائیاں شروع ہو سکتی ہیں۔ داعش نے جنوری سن دو ہزار چودہ میں اس شہر پر قبضہ کیا تھا، جس کے بعد اس شدت پسند تنظیم کے جنگجوؤں نے شام اور عراق کے ایک بڑے رقبے کو بھی اپنے کنٹرول میں لے لیا تھا۔ الرقہ میں داعش کی شکست کو علامتی فتح قرار دیا جا رہا ہے تاہم ماہرین نے کہا ہے کہ وہاں پائیدار قیام امن کے لیے ایک مربوط پالیسی کی ضرورت ہے۔

شمالی کوریا کے معاملے پر کلنٹن کی ٹرمپ پر تنقید

سابق امریکی وزیر خارجہ ہلیری کلنٹن نے صدر ڈونلڈ ٹرمپ کی طرف سے شمالی کوریا کے بارے میں دیے جانے بیانات کو کڑی تنقید کا نشانہ بنایا ہے۔ ڈیموکریٹ سیاستدان کلنٹن نے سیول میں ایک تقریب سے خطاب میں کہا کہ ری پبلکن صدر کی طرف سے ٹوئٹر پیغامات سے پیونگ یانگ کو عالمی توجہ مل رہی ہے جبکہ واشنگٹن کی عالمی ساکھ کو نقصان پہنچ رہا ہے۔ کلنٹن نے مزید کہا ہے کہ وہ ٹرمپ کی طرف سے تناؤ بڑھانے پر پریشان ہیں اور اس معاملے کو ’خطرناک‘ طریقے سے حل نہیں کیا جا سکتا۔ سابق امریکی خاتون اول نے یہ بھی کہا کہ ٹرمپ کو شمالی کوریا کے بارے میں اپنی ’لفظی جنگ‘ کو ختم کر دینا چاہیے۔

نیوزی لینڈ میں حکومت سازی کوشش بدستور جاری

نیوزی لینڈ کے عوامیت پسند ’بادشاہ گر‘ ونسٹن پیٹرز نے کہا ہے کہ وہ جمعرات کو اعلان کریں گے کہ آئندہ نئی حکومت سازی میں کس پارٹی کی حمایت کی جائے گی۔ نیوزی لینڈ کے الیکشن کو چار ہفتے گزر چکے ہیں لیکن ابھی تک حکومت سازی کے مذاکرات میں کامیابی نہیں ہو سکی ہے۔ تئیس ستمبر کے الیکشن میں قدامت پسند وزیر اعظم بل انگلش یا بائیں بازو سے تعلق رکھنے والی اعتدال پسند جیسینڈا آرڈرن واضح برتری حاصل نہیں کر سکے تھے۔ اس لیے نیوزی لینڈ فرسٹ نامی پارٹی کے پیٹر جس جماعت کی حمایت کریں گے، وہی نئی حکومت بنا سکے گی۔

Albanian Shqip

Amharic አማርኛ

Arabic العربية

Bengali বাংলা

Bosnian B/H/S

Bulgarian Български

Chinese (Simplified) 简

Chinese (Traditional) 繁

Croatian Hrvatski

Dari دری

English English

French Français

German Deutsch

Greek Ελληνικά

Hausa Hausa

Hindi हिन्दी

Indonesian Bahasa Indonesia

Kiswahili Kiswahili

Macedonian Македонски

Pashto پښتو

Persian فارسی

Polish Polski

Portuguese Português para África

Portuguese Português do Brasil

Romanian Română

Russian Русский

Serbian Српски/Srpski

Spanish Español

Turkish Türkçe

Ukrainian Українська

Urdu اردو