فرنچ اوپن طویل وقفے کے بعد پھر سرینا کے نام

نمبر وَن سرینا ولیمز بلاشبہ جانتی تھی کہ انہوں نے فرنچ اوپن صرف ایک مرتبہ جیتا تھا اور اس بات کو 11 برس بیت چکے ہیں۔ وہ یہ بھی جانتی تھیں گزشتہ برس پیرس میں کیا ہوا تھا: وہ اپنے کیریئر میں پہلی مرتبہ پہلے راؤنڈ میں ہی گرینڈ سلام میں شکست کھا گئی تھیں اور وہ بھی ایک ایسی کھلاڑی سے جس کا نام پہلی ایک سو کھلاڑیوں میں کہیں نہیں تھا۔

ان سب باتوں کے تناظر میں ہفتے کو سرینا کورٹ میں اتریں تو وہ یقیناﹰ 2002ء کی اس خوشی کو پھر سے محسوس کرنا چاہتی تھیں جو انہیں فرنچ اوپن پہلی مرتبہ جیت کر ملی تھی۔ یہی وجہ تھی کہ انہوں نے نمبر ٹو شاراپوا کا جم کر مقابلہ کیا اور بالآخر انہیں چھ چار چھ چار سے مات دی۔

گزشتہ نو برس میں خواتین کے مقابلوں میں نمبر ایک اور نمبر دو کھلاڑیوں کے درمیان یہ پہلا میچ تھا۔ شاراپوا نے سرینا کے بارے میں کہا: ’’وہ بہت اچھا کھیل پیش کر رہی ہیں۔ وہ مضبوط حریف ہیں۔‘‘

اپنے کیریئر میں یہ سرینا کی سولہویں بڑی جیت ہے۔ اس فتح کے بات انہوں نے مسکراتے ہوئے کہا: ’’گزشتہ برس کی شکست سے میں ابھی تک کسی حد تک اپ سیٹ ہوں۔‘‘

انہوں نے مزید کہا: ’’لیکن میرے خیال میں اہمیت اس بات کی ہے کہ آپ کس طرح پھر سے اُٹھ کھڑے ہوتے ہیں۔ میرا خیال ہے کہ میں نے ہمیشہ یہ کہا ہے کہ چیمپیئن کا مطلب یہ نہیں وہ کتنی مرتبہ جیتے، بلکہ اس کا مطلب ہے کہ وہ تنزلی کے دَور سے کیسے نکلے، چاہے یہ کسی انجری کے باعث ہو یا کسی شکست کی وجہ سے۔‘‘

اس بیان کے آخری الفاظ کی ادائیگی کے بعد سرینا کی آواز بھر آئی اور ان کی آنکھوں نَم ہو گئیں۔ 31 سالہ امریکی کھلاڑی کے کیریئر میں تنزلی کے ایسے دَور رہے ہیں جن میں سے شاید 2011ء کے آخر میں ختم ہونے والے 10 ماہ سے برا کوئی وقت نہیں تھا۔ اس دوران ان کے پاؤں کا دو مرتبہ آپریشن ہوا جبکہ پھیپھڑوں میں خون کے لوتھڑوں کے باعث بھی وہ زیرِ علاج رہیں۔

فرنچ اوپن میں تازہ فتح کے بعد ان کا کیریئر ایک مرتبہ پھر بلندیوں کو چھو رہا ہے، جس کا وہ بھرپور لطف اٹھا رہی ہیں۔ یہ ان کی مسلسل اکتیسویں کامیابی بھی ہے۔

ng/aba(AP)