ماسکو اير پورٹ بم دھماکے کے بعد مسلمانوں کے انديشے

اس بم دھماکے ميں 35 افراد ہلاک ہوگئے اور اس بات کی تمام علامات پائی جاتی ہيں کہ اس کے پيچھے روس کے شورش زدہ شمالی قفقاز کے علاقے کے مسلمان شدت پسندوں کا ہاتھ ہے۔

پچھلے سال مارچ ميں قفقاز کے علاقے داغستان کی دو عورتوں نے ماسکو کی انڈر گراؤنڈ ريلوے پر خود کش حملے کئے تھے۔ اس کے بعد ماسکو ميں قفقاز اور وسط ايشيا کے مسلم تارکين وطن پر نسل پرستانہ حملوں کی ايک لہر امڈ آئی تھی۔

پير کو ماسکو کے دوموديوو ائر پورٹ پر خودکش حملے کی ذمے داری ابھی تک کسی نے قبول نہيں کی ہے ليکن تارکين وطن رہنما ممکنہ نسل پرستانہ حملوں کا انديشہ ظاہر کررہے ہيں۔ ماسکو ميں روسی اسلامی ثقافتی مرکز کے رسلان کُربانوف نے کہا: ’’ميرے خيال ميں اس حملے سے روس ميں قفقاز کے مسلمانوں اور بقيہ آبادی کے درميان اجنبيت، خوف حتٰی کہ نفرت تک ميں اور اضافہ ہوجائے گا۔ ويسے ہی روسيوں ميں مسلم مخالف جذبات بہت بڑھ گئے ہيں۔ آپ سڑکوں پر آتے جاتے، عام روسيوں کے چہروں سے اس کا اندازہ لگا سکتے ہيں۔‘‘

روس کی آبادی کا ساتواں يا تقريباً 14 فيصد حصہ مسلمان اقليت پر مشتمل ہے۔ ماسکو کی سڑکوں پر تناؤ اس قدر بڑھ چکا ہے کہ صدر ولادیمير پوٹن نے پچھلے ماہ لوگوں سے کہا کہ وہ اجنبيوں سے نفرت والی قوم پرستی سے بچيں۔ چند دن پہلے شمالی قفقاز کے ايک فرد کے ہاتھوں ايک روسی کے قتل کے بعد سينکڑوں روسی قوم پرستوں نے کريملن سے کچھ ہی دور جلوس نکالا تھا جس ميں فاشسٹ طريقے سے ہاتھ بلند کئے گئے اور نسل پرستانہ نعرے لگائے گئے۔ پوليس نے نوجوانوں کو قابو ميں رکھنے کی کوشش کی جو جلد ہی تشدد پر اتر آئے اور انہوں نے ماسکو کی انڈر گراؤنڈ ريلوے کے غير سلاوی يا غير روسی دکھائی دينے والے مسافروں پر حملے کئے۔

امريکی ريسرچ انسٹيٹيوٹ جيمس ٹاؤن فاؤنڈيشن کے صدر گلين ہاورڈ نے کہا: ’’ماسکو ميں ہونے والے حملوں سے اس کشيدگی ميں مزيد اضافہ ہوگا جو دائيں بازو سے تعلق رکھنے والے روسيوں کے ماسکو ميں مظاہروں سے پيدا ہوئی ہے اور اس کے نتيجے ميں شمالی قفقاز کے لوگوں پر حملوں ميں بھی اضافہ ہوگا۔ ‘‘

اگرچہ چيچین قوم پرستوں نے اس سے پہلے ہونے والے اس طرح کے حملوں کی ذمے داری قبول کی ہے ليکن روسی صدر ميدويديف اور وزير اعظم پوٹن دونوں نے پير کو ماسکو ائرپورٹ کے بم دھماکے پر ردعمل ميں اس کا تعلق براہ راست قفقاز سے جوڑنے سے گريز کيا ہے۔ شايد يہی وجہ ہے کہ روسی قوم پرستوں نے اس کے جواب ميں کوئی فوری کارروائی نہيں کی ہے۔

ماسکو ميں نفرت کی بنياد پر کئے جانے والے جرائم پر نظر رکھنے والے مرکز سووا کی گالينا کوژيونيکووا نے کہا: ’’اس دفع حالات پرسکون رہے ہيں کيونکہ فوری طور پر کسی پر اس بم دھاکے کا الزام نہيں لگايا گيا ہے۔ اگر اس قسم کے واقعے کے بعد فوراً مار پٹائی کا سلسلہ شروع نہيں ہوتا تو پھر ہنگامے نہيں ہوتے۔ سب سے زيادہ خطرناک شروع کے دو تين دن ہی ہوتے ہيں جب لوگ غصے اور طيش ميں ہوتے ہيں۔‘‘

رپورٹ: شہاب احمد صدیقی

ادارت: کشور مصطفیٰ