معاہدے کے نظریے پر نوبل انعام برائے معاشیات

برطانوی نژاد امریکی ماہر اقتصادیات اولیور ہارٹ اور فن لینڈ سے تعلق رکھنے والے بینگٹ ہولمسٹروم نے نظریہ معاہدت پر انقلابی تحقیق کرتے ہوئے وہاں پہنچا دیا ہے، کہ اسے انشورنس پالیسیوں، ایگزیکیٹیوز کی تنخواہوں اور حتیٰ کہ جیل کے انتظام میں بھی استعمال کیا جا سکتا ہے۔

ان دونوں ماہرین معاشیات نے کانٹریکٹ تھیوری، جسے پیچیدہ اور متنوع موضوعات کے لیے تفصیلی فریم ورک قرار دیا جا رہا ہے، تخلیق کی ہے۔ نوبل جیوری کے مطابق اس نظریے کو استعمال میں لا کر کام کی بنیاد پر اعلیٰ عہدیداروں کی تنخواہیں، انشورنس کمپنیوں میں ادائیگیوں اور عوامی شعبے کی نج کاری کی سرگرمیوں کو بہ خوبی انجام دیا جا سکتا ہے۔

جیوری کی جانب سے ان ماہرین کے لیے نوبل انعام کا اعلان کرتے ہوئے کہا گیا ہے کہ اس نظریہ کے تحت اداروں اور پالیسیوں کی تخلیق کے لیے علمی اور دانش ورانہ بنیاد فراہم کر دی گئی ہے۔

ان دونوں ماہرین نے علیحدہ علیحدہ تحقیق کرتے ہوئے اس نظریے کہ ایسے ٹولز تخلیق کر لیے ہیں، جن سے یہ معلوم ہو جاتا ہے کہ اساتذہ، طبی شعبے کے کارکنان اور جیلوں کے محافظوں کی طے شدہ تنخواہیں ہونا چاہییں یا انہیں ان کی کارکردگی پر معاوضہ ادا کیا جانا چاہیے۔ اس طرح ان ماہرین نے عوامی شعبے مثلا اسکولوں، ہسپتالوں اور جیل خانوں کی بابت یہ بھی طے کر دیا ہے کہ کیا یہ حکومتی انتظام میں ہونا چاہیں یا نجی ملکیت میں۔

جیوری کی جانب سے جاری کردہ بیان میں کہا گیا ہے، ’’ہارٹ اور ہولمسٹروم نے وہ نظریاتی آلے تخلیق کر دیے ہیں، جن سے زندگی کے معاہدوں اور اداروں کے انتظامات کے ساتھ ساتھ ان معاہدوں میں موجود باریک دراڑوں کو بھی دیکھا جا سکتا ہے۔‘‘

ہارٹ سن 1948ء میں پیدا ہوئے اور وہ اب امریکا کی ہاورڈ یونیورسٹی میں معاشیات کے پروفیسر ہیں، جب کہ 67 سالہ ہولمسٹروم امریکی ادارے میسیچوسیٹ ایسٹیٹیوٹ آف ٹیکنالوجی میں اقتصادیات اور مینیجمنٹ کے پروفیسر کے طور  پر خدمات انجام دے رہے ہیں۔