وادی سوات میں قیام امن کے لئے پشاور میں مذاکرات

ان مذاکرات کے حوالے سےپاکستانی صوبہ سرحد کے وزیر اطلاعات میاں افتخار حسین نے جو صوفی محمد اور ان کے نمائندوں سے پہلے بھی ملاقات کرچکے ہیں خبر ایجنسی روئٹرز کے ساتھ ایک انٹرویو میں کہا کہ انہیں بہت زیادہ امید ہے کہ پشاور میں ہونے والی بات چیت کے نتیجے میں سوات میں قیام امن کا حصول ممکن ہو جائے گا۔

سوات میں مذہبی قدامت پسند حلقے طویل عرصے سے شرعی قوانین کے نفاذ کے لئے کوشاں ہیں اور پشاور میں صوبائی حکومت قانونی اور سیاسی دائرہ کار میں رہتے ہوئے سوات میں اسلام پسندوں کے کچھ مطالبات اس طرح مان لینے پر تیار بھی ہے کہ ان کو عوامی سطح پر قابل قبول بھی بنا دیا جائے اور وادی میں امن کا قیام بھی ممکن ہو جائے۔

اس سلسلے میں سوات میں مقامی طالبان کہلانے والے عسکریت پسندوں نے اتوار کے دن سے یکطرفہ طور پر دس روزہ فائر بندی پر عمل درآمد بھی شروع کردیا ہے۔ اسی تناظر میں صوبائی وزیر اطلاعات میاں افتخار حسین کا کہنا ہے کہ پشاور حکومت صحیح سمت میں پیش رفت جاری رکھے ہوئے ہے اور اسلام آباد میں وفاقی حکومت کی منظوری کے بعد ان "نفاذ عدل" ضابطوں کا اعلان کردیا جائے گا جو وادی سوات میں عسکریت پسندی کے خاتمے اور امن کے حصول میں بہت مددگار ثابت ہو سکیں گے۔